নিউজিলেণ্ড ক্ৰিকেট দলৰ অভিজ্ঞ বেটাৰ কেন উইলিয়ামছনে ৰচিলে ইতিহাস। নিউজিলেণ্ড দলৰ হৈ টেষ্ট ক্ৰিকেটত ৯০০০ ৰান সংগ্ৰহ কৰা প্ৰথমগৰাকী ক্ৰিকেটাৰত পৰিণত হ’ল উইলিয়ামছন। ৩৪ বছৰীয়া উইলিয়ামছনে নিজৰ ১০৩ সংখ্যক টেষ্টৰ ১৮২ নং ইনিংছত এই বিশেষ কৃতিত্ব গঢ়িবলৈ সক্ষম হয়।
নিউজিলেণ্ডৰ হৈ সৰ্বাধিক ৰান সংগ্ৰহ কৰাৰ তালিকাত উইলিয়ামছনৰ পিছতে আছে প্ৰাক্তন বেটাৰ ৰছ টেইলৰ। ২০০৭ চনৰ পৰা ২০২২ চনলৈ নিউজিলেণ্ডৰ হৈ খেলা টেইলৰে ১১২ খন মেচৰ ১৯৬টা ইনিংছত সংগ্ৰহ কৰিছিল ৭৬৮৩ ৰান।
দ্ৰুতগতিত ৯০০০ টেষ্ট ৰান সংগ্ৰহ কৰা বিশ্বৰ অষ্টমগৰাকী ক্ৰিকেটাৰ
নিউজিলেণ্ডৰ তাৰকা ক্ৰিকেটাৰ উইলিয়ামছনে নিজৰ ১৮২ নং ইনিংছত ৯০০০ ৰান সম্পূৰ্ণ কৰে। ইয়াৰ লগে লগে তেওঁ দ্ৰুতগতিত ৯০০০ ৰান সংগ্ৰহ কৰা বিশ্বৰ অষ্টমগৰাকী ক্ৰিকেটাৰত পৰিণত হয়। টেষ্ট ক্ৰিকেটত এতিয়ালৈকে সৰ্বমুঠ ১৯ গৰাকী বেটাৰে ৯০০০ ৰান সম্পূৰ্ণ কৰিছে।
বৰ্তমানৰ ফেব ফোৰ খেলুৱৈৰ ভিতৰত ৯০০০ টেষ্ট ৰান সংগ্ৰহ কৰা দ্বিতীয় দ্ৰুততম খেলুৱৈ হিচাপে পৰিগণিত হৈছে কেন উইলিয়ামছন। এই তালিকাৰ প্ৰথম স্থানত আছে ষ্টিভ স্মিথ। স্মিথে ১৭৪ সংখ্যক টেষ্ট ইনিংছত ৯০০০ ৰানৰ সংখ্যা স্পৰ্শ কৰিছিল। এই দুগৰাকী মহান খেলুৱৈৰ উপৰি জ’ ৰুটে ১৯৬ সংখ্যক টেষ্ট ইনিংছত আৰু বিৰাট কোহলীয়ে ১৯৭টা ইনিংছত ৯০০০ ৰান সম্পূৰ্ণ কৰিছিল।
