শেহতীয়াকৈ বেংগালুৰু আৰক্ষীয়ে ২৭ বছৰ ধৰি ৮৮টা চুৰি গোচৰত অভিযুক্ত এজন চোৰক গ্ৰেপ্তাৰ কৰে। শেহতীয়াকৈ এই চোৰজনে কোডিগেহল্লীৰ এটা ঘৰত লুটপাত কৰি ৯.২০ লাখ টকাৰ মূল্যৱান সামগ্ৰী লৈ পলায়ন কৰিছিল।
এই ঘটনা সংঘটিত হৈছে বেংগালৰুৰ এখন ভিতৰুৱা গাঁৱত। অন্ধ্ৰপ্ৰদেশৰ বাসিন্দা শ্ৰীনিবাসে ১৯৯৮ চনৰ পৰা সমগ্ৰ অন্ধ্ৰপ্ৰদেশ আৰু কৰ্ণাটকৰ বহুতো ঘৰৰ লুটপাত চলাই আহিছিল বুলি আৰক্ষীয়ে জানিবলৈ দিয়ে। মেকানিকেল ইঞ্জিনিয়াৰিঙৰ স্নাতক শ্ৰীনিৱাসে পূৰ্বতে তেলেগু চলচ্চিত্ৰ উদ্যোগত কাৰিকৰী ক্ৰু মেম্বাৰ হিচাপে কাম কৰিছিল বুলি আৰক্ষীয়ে জনায়।
কিন্তু জুৱাৰ প্ৰতি আসক্তি আৰু আড়ম্বৰপূৰ্ণ জীৱনশৈলীৰ বাবে চুৰি কৰিবলৈ বাধ্য হৈছিল বুলি তেওঁলোকে কয়। এগৰাকী আৰক্ষী বিষয়াৰ মতে, তেওঁৰ ভাই-ভনীসকল আমেৰিকা আৰু অষ্ট্ৰেলিয়াত কৰ্মৰত।
উল্লেখ্য যে, ১৬ এপ্ৰিলত কোডিগেহল্লীৰ বালাজী লেআউটৰ এটা ঘৰত কোনো নথকাৰ সুযোগ লৈ ৰড ব্যৱহাৰ কৰি ঘৰৰ দুৱাৰ খুলি সকলো মূল্যৱান সামগ্ৰী চুৰি কৰে বুলি আৰক্ষীয়ে জানিবলৈ দিয়ে। পিছে শ্ৰীনিবাসৰ আঙুলিৰ ছাপ সেই স্থানতে এৰি থৈ গৈছিল, আৰু আৰক্ষীৰ আঙুলিৰ ছাপ বিশেষজ্ঞসকলে ২০২২ চনত পূৰ্বৰ গ্ৰেপ্তাৰৰ ৰেকৰ্ডৰ সৈতে মিলাই এই ঘটনাৰ সৈতে শ্ৰীনিবাস জড়িত থকা বুলি নিশ্চিত কৰে।
২ মে’ত আৰক্ষীয়ে শ্ৰীনিবাসক আটক কৰে।
আৰক্ষীয়ে জনোৱা অনুসৰি, শ্ৰীনিবাসৰ বিৰুদ্ধে হায়দৰাবাদৰ মাধাপুৰ আৰু সৰোজিনী নগৰ, কৰ্ণাটকৰ বিদাৰ, অন্ধ্ৰপ্ৰদেশৰ এলুৰু চহৰত গোচৰ ৰুজু হৈছে। পিছে ৮৮ টা গোচৰ থকাৰ পিছতো তেওঁ কেতিয়াও দোষী সাব্যস্ত হোৱা নাই বুলি আৰক্ষীয়ে জনায়।
