কেৰালাৰ নিবাসী ২৯ বছৰীয়া অতুল্য শেখৰৰ মৃত্যুৰ এমাহৰ পাছতে তেওঁৰ স্বামীক গ্ৰেপ্তাৰ কৰিছে আৰক্ষীয়ে। ইউ এ ইৰ পৰা উভতি অহা অতুল্যৰ স্বামী সতীশক তিৰুৱনন্তপুৰম আন্তঃৰাষ্ট্ৰীয় বিমানবন্দৰৰ পৰা আৰক্ষীয়ে আটক কৰি কোল্লামৰ থেক্কুম্ভগম আৰক্ষীক গতাই দিয়ে।
সতীশৰ বিৰুদ্ধে অতুল্যক হত্যা, আক্ৰমণ, যৌতুক দাবী আদি বহু গুৰুতৰ অভিযোগ উত্থাপন হৈছে। অৱশ্যে ভাৰতলৈ অহাৰ পূৰ্বে সতীশে জিলা আদালতৰ পৰা আগতীয়া জামিন লৈছিল। এনে পৰিস্থিতিত আৰক্ষীয়ে বক্তব্য ৰেকৰ্ডিং কৰি সতীশক মুকলি কৰি দিয়ে।
এই গোচৰৰ তদন্ত ক্ৰাইম ব্ৰাঞ্চৰ হাতত অৰ্পণ কৰিছে কেৰালাৰ গৃহ মন্ত্ৰালয়ে। অতুল্যৰ পিতৃ-মাতৃয়ে সতীশৰ বিৰুদ্ধে এজাহাৰ দাখিল কৰিছে। তেওঁলোকে কয় যে, সতীশে পূৰ্বতে তেওঁলোকৰ জিয়ৰীক শাৰীৰিক নিৰ্যাতন চলাইছিল আৰু যৌতুকৰ নামত হাৰাশাস্তি কৰিছিল। তেওঁলোকৰ ছোৱালীয়ে প্ৰায়ে ফোনত তেওঁৰ ওপৰত সংঘটিত হোৱা অত্যাচাৰৰ কাহিনী কৈছিল।
১৯ জুলাইত যেতিয়া গম পোৱা গ’ল যে অতুল্যই ইউ এ ইত আ*ত্মহ*ত্যা কৰিছে, তেতিয়া তেওঁৰ পৰিয়ালত এই শোকৰ খৱৰটো বিয়পি পৰে। তেওঁৰ মৃতদেহ ইউ এ ইৰ পৰা কেৰালালৈ অনাৰ পিছতে পৰিপল্লী মেডিকেল কলেজত অতুল্যৰ মৰণোত্তৰ পৰীক্ষা কৰা হয়।
ইউ এ ইৰ শ্বাৰজাহ আৰক্ষীয়ে অতুল্যৰ মৃত্যুক আ*ত্মহ*ত্যা বুলি ঘোষণা কৰিছে। অৱশ্যে এই ঘটনাৰ বাবে অতুল্যয়াৰ পৰিয়ালে তেওঁৰ স্বামী সতীশক জগৰীয়া কৰিছে। একে সময়তে সতীশেও এই অভিযোগসমূহ সম্পূৰ্ণৰূপে নাকচ কৰিছে।
