ভাবি লওক যে আপুনি আপোনাৰ গাঁৱৰ গেলামালৰ দোকান এখনত বহি থকা সময়তে আপোনাৰ ফোনটো বাজি উঠিল। ফোনৰ সিটো মূৰত থকা জনে কয়, ‘হেল্ল’, মই বিৰাট কোহলী।’ কিছু মুহূৰ্তৰ পিছত আন এটা ফোন আহিল, এইবাৰ ক’লে, ‘মই এ বি ডি ভিলিয়াৰ্ছ।’ তাৰ পাছত আন এটা কল, ‘মই ৰজত পাটিদাৰ।’
আমি উল্লেখ কৰা এই কথাখিনি হয়তো বলীউডৰ কমেডী ছবিৰ দৃশ্য যেন লাগিব পাৰে, কিন্তু বাস্তৱত এয়া সত্য কাহিনী। ছত্তীশগড়ৰ গৰিয়াবন্দ জিলাৰ দেৱভোগৰ মাদাগাঁৱৰ এজন যুৱকৰ সৈতে সংঘটিত হৈছে এই ঘটনা।
যুৱকজনৰ ফোনত কেইবাগৰাকীও আগশাৰীৰ ক্ৰিকেটাৰৰ ফোন অহাৰ এই খবৰ ক্ৰমান্বয়ে বিয়পি পৰাত সমগ্ৰ ৰাজ্যৰ ক্ৰিকেট প্ৰেমীসকলৰ মাজত ঘটনাটো চৰ্চাৰ বিষয় হৈ পৰে।
ঘটনাৰ বিৱৰণী অনুসৰি, যুৱকজনক যিটো ফোন নম্বৰ আৱণ্টন দিয়া হৈছিল, সেইটো পূৰ্বতে আছিল ক্ৰিকেটাৰ ৰজত পাটিদাৰৰ নামত। ২১ বছৰীয়া মনীষে ২৮ জুনত এটা মোবাইল চেণ্টাৰৰ পৰা এখন জিঅ’ ছিমকাৰ্ড ক্ৰয় কৰিছিল। ছিমখনত সেইটো নম্বৰেই আছিল, যিটো পূৰ্বতে ক্ৰিকেটাৰ পাটিদাৰে ব্যৱহাৰ কৰিছিল।
জানিব পৰা অনুসৰি, ৯০ দিন ধৰি ছিমখন বন্ধ হৈ থকা বাবে কোম্পানীয়ে এই নম্বৰটো নতুন গ্ৰাহকক আৱণ্টন দিয়ে। ছিম সক্ৰিয় হোৱাৰ পিছত মনীষে হোৱাটছএপ ইনষ্টল কৰে, য’ত আছিল ৰজত পাটিদাৰৰ প্ৰফাইল ফটো।
প্ৰথম অৱস্থাত মনীষে ভাবিছিল এয়া কোনো ছফ্টৱেৰ বা ধেমালি, কিন্তু ইয়াৰ কিছু দিনৰ পিছৰ পৰাই তেওঁৰ মোবাইলত বিভিন্ন অজ্ঞাত লোকৰ ফোন আহিব ধৰে।
অজ্ঞাত লোকসকলৰ ভিতৰত নিজকে বিৰাট কোহলী, এবি ডিভিলিয়াৰ্ছ আৰু আন ক্ৰিকেটাৰ বুলিও কোৱা ব্যক্তিও আছে। মনীযে তেওঁৰ সৈতে কোনো লোকে এয়া ধেমালি কৰা বুলি ভাবি সাধাৰণভাৱে কথাবোৰ গ্ৰহণ কৰিছিল।
১৫ জুলাইতহে ঘটনাটোৰ প্ৰকৃত ৰহস্য ওলাই পৰে যেতিয়া মনীষৰ ফোনত ক্ৰিকেটাৰ ৰজত পাটিদাৰে ফোন কৰি ছিমখন তেওঁক ওভতাই দিবলৈ অনুৰোধ জনায়। এইবাৰো মনীষে কথাটো সহজভাবেই লৈছিল, কিন্তু আৰক্ষীৰ লোক তেওঁৰ ঘৰত উপস্থিত হোৱাতহে হতভম্ব হৈ পৰে।
প্ৰকৃততে ৰজত পাটিদাৰে ছিমখন ওভতাই পাবৰ বাবে চাইবাৰ চেল আৰু গৰিয়াবন্দ আৰক্ষীৰ সহায় লৈছিল। দেৱভোগ আৰক্ষী থানাৰ ভাৰপ্ৰাপ্ত বিষয়া ফৈজুল শ্বাহ হোদাই জনোৱা মতে, চাইবাৰ চেলৰ অনুৰোধত মনীষৰ পিতৃৰ সৈতে কথা পাতি চিম কাৰ্ডখন ঘূৰাই দিয়া হয়। ইতিমধ্যে ৰজত পাটিদাৰৰ ঠিকনালৈ প্ৰেৰণ কৰা হৈছে ছিমখন।
ইফালে চিনেমাৰ কাহিনীৰ দৰে লগা এই অপ্ৰত্যাশিত ঘটনাটো মনীষে জীৱনভৰ মনত ৰাখিব বুলিও উল্লেখ কৰে।
