পেহেলগাম সন্ত্ৰাসবাদী আক্ৰমণৰ পিছত মঙলবাৰে নিশা ভাৰতীয় সেনাই ‘অপাৰেশ্যন সিন্দুৰ’ৰ জৰিয়তে পাকিস্তানৰ ৯টা ঘাটিত আক্ৰমণ সংঘটিত কৰে। ইয়াৰ পিছতে দুয়োখন দেশৰ মাজত বৃদ্ধি পোৱা যুদ্ধসৃশ পৰিস্থিতিৰ প্ৰতি লক্ষ্য ৰাখি ভাৰত চৰকাৰে কিছু অঞ্চলত আকাশমাৰ্গত সাময়িক নিষেধাজ্ঞা আৰোপ কৰিছে।
ভাৰত চৰকাৰৰ এই সিদ্ধান্তৰ পিছতে ইণ্ডিগো আৰু এয়াৰ ইণ্ডিয়াই পুৱা ৫:৩০ বজালৈকে বহু বিমান সেৱা বাতিল কৰিছে। বিশেষকৈ উত্তৰ ভাৰতৰ বহু বিমানবন্দৰত এই নিষেধাজ্ঞাৰ প্ৰভাৱ দেখা গৈছে।
দেশৰ ১৮টা বিমানবন্দৰ সাময়িকভাৱে বন্ধ কৰি দিয়া হৈছে। তাৰ ভিতৰত জম্মু, শ্ৰীনগৰ, লেহ, যোধপুৰ, অমৃতসৰ, ভূজ, চণ্ডীগড়, পাঠানকোট, যোধপুৰ, জয়ছলমেৰ, শিমলা, ধৰ্মশালা, জামনগৰ, নন্দেড়, কিশানগড়, আদমপুৰ, হিণ্ডন আৰু ৰাজকোট বিমানবন্দৰ।
১৬৫ খনতকৈও অধিক ইণ্ডিগ’ৰ বিমান বাতিল
অমৃতসৰ, বিকানেৰ, চণ্ডীগড়, ধৰ্মশালা, গোৱালিয়ৰ, জম্মু, যোধপুৰ, কিশানগড়, লেহ, ৰাজকোট, শ্ৰীনগৰ আদি চহৰৰ পৰা বিমান পৰিবহণ ব্যাহত হোৱা বুলি এয়াৰলাইন্স ইণ্ডিগ’ই যাত্ৰীসকলক অৱগত কৰিছে। এই সকলোবোৰ বিমান ১০ মে’ৰ পুৱা ৫:২৯ বজালৈকে বাতিল কৰা হৈছে।
ইণ্ডিগো এয়াৰলাইন্সে যাত্ৰীসকলক বিমানবন্দৰলৈ যোৱাৰ পূৰ্বে ৱেবছাইট (www.goindigo.in) বা মোবাইল এপত বিমানৰ অৱস্থা পৰীক্ষা কৰিবলৈ আহ্বান জনাইছে। যিসকল যাত্ৰীৰ বিমান বাতিল হয় তেওঁলোকে কোনো অতিৰিক্ত চাৰ্জ নোলোৱাকৈ পৰৱৰ্তী উপলব্ধ বিমানত যাত্ৰাৰ সময় নিৰ্ধাৰণ কৰিব পাৰিব বা বুকিং বাতিল কৰিলে সম্পূৰ্ণ ধন ঘূৰাই পাব।
