২০২৪বৰ্ষই মেলানী মাগিবলৈ মাজত মাত্ৰ আৰু কেইটামান ক্ষণ। কেলেন্দাৰৰ পাতত অতীত হৈ ৰ’ব ২০২৪। পাৰ হৈ যোৱা সময়ৰ স্মৃতি বুকুত বান্ধি নতুনক আদৰিবলৈ সাজু প্ৰত্যেকজন ব্যক্তি। গতিকে অতীত হ’ব খোজা ২০২৪ক আকৌ এবাৰ উভতি চাব খুজিছো। বিশেষকৈ শিক্ষা, সাহিত্য-সংস্কৃতি, ক্ৰীড়া ৰাজনীতিকে ধৰি সমাজৰ বিভিন্ন ক্ষেত্ৰত উজলি উঠে বহুগৰাকী।
২০২৪ বৰ্ষত অসম তথা সমগ্ৰ ভাৰতকে প্ৰতিনিধিত্ব কৰি অভিলেখ গঢ়িবলৈ সক্ষম হয় এইকেইখন ছবিয়ে।
- আইমী বৰুৱাৰ ছবি ‘বিৰুবালা- উইটচ টু পদ্মশ্ৰী’য়ে নন ফিচাৰ ফিল্ম শাখাত ৭০ সংখ্যক ৰাষ্ট্ৰীয় চলচ্চিত্ৰৰ বিশেষ বঁটা লাভ কৰে। তথ্যচিত্ৰখনত ডাইনী চিকাৰৰ অন্ধবিশ্বাসৰ বিৰুদ্ধে কণ্ঠস্বৰ ক্ৰুছেডাৰ বীৰুবালা ৰাভাৰ জীৱন আৰু পোষকতাৰ বুৰঞ্জী লিখা হৈছে। ৰাষ্ট্ৰপতি দ্ৰৌপদী মুৰ্মুৱে জনসচেতনতা বৃদ্ধিৰ ক্ষেত্ৰত ৰাভাৰ উল্লেখযোগ্য অৱদানক স্বীকৃতি দি এই বঁটা প্ৰদান কৰে। ইয়াৰ পূৰ্বে ২০২১ চনত ৰাভাই এই প্ৰচেষ্টাৰ বাবে পদ্মশ্ৰী বঁটা লাভ কৰিছিল।
- অসমীয়া চলচ্চিত্ৰ জগতত শেহতীয়াকৈ খোজ পেলোৱা পৰিচালক কুলনন্দিনী মহন্ত পৰিচালিত ‘এমুঠি পুঠি’য়ে আঞ্চলিক ভাষাৰ ছবিৰ শিতানত ৰজত কমল বঁটা লাভ কৰে। এই “এমুঠি পুঠি” ছবিখনে শ্ৰেষ্ঠ অসমীয়া বৈশিষ্ট্যপূৰ্ণ ছবিৰ সন্মান লাভ কৰে।‘এমুঠি পুঠি’ৰ আন এক উল্লেখনীয় প্ৰসংগ হ’ল iPhone ৰে নিৰ্মাণ কৰা এইখন উত্তৰ-পূৰ্বাঞ্চলৰ প্ৰথমখন চিনেমা।
- দক্ষিণ কোৰিয়াৰ বুছান চহৰত অনুষ্ঠিত হোৱা ২৯ সংখ্যক আন্তঃৰাষ্ট্ৰীয় চলচ্চিত্ৰ মহোৎসৱত ‘শ্ৰেষ্ঠ ছবি’ৰ শিতানত বিশেষ বঁটা আঁজুৰিলে ৰীমা দাসৰ ছবি ‘ভিলেজ ৰকষ্টাৰ ২’ এ । ভাৰতীয় ফিচাৰ ফিল্ম হিচাপে ২৯ সংখ্যক বুছান আন্তঃৰাষ্ট্ৰীয় চলচ্চিত্ৰ মহোৎসৱত ছবিখনে লাভ কৰে ‘কিম জিচিঅ’ক বঁটা’ । প্ৰশংসনীয় কথাটো হ’ল যে জিছঅ’ক প্ৰতিযোগিতা শিতানত আঠখন ছবিৰ ভিতৰত নিৰ্বাচিত হোৱা একমাত্ৰ ভাৰতীয় ফিছাৰ হিচাপে চিহ্নিত হৈছিল ‘ভিলেজ ৰকষ্টাৰ্ছ ২’ ।’ভিলেজ ৰকষ্টাৰ’ৰ চিকুৱেল ছবি ‘ভিলেজ ৰকষ্টাৰ ২’ হৈছে স্বকীয় শৈলীৰে অসমবাসীলৈ ব্যতিক্ৰমী ছবি উপহাৰ দিয়া ৰীমা দাসৰ আন এক সফলতা।
- দিল্লীত জন্মগ্ৰহণ কৰা নিশা পহুজাৰ ছবি ‘টু কিল এ টাইগাৰ’ ছবিখনে অস্কাৰ ২০২৪ৰ বাবে শ্ৰেষ্ঠ বৈশিষ্ট্যপূৰ্ণ তথ্যচিত্ৰ শিতানত মনোনীত হৈছে।‘টু কিল এ টাইগাৰ’ৰ মূল বিষয়বস্তু হৈছে ভাৰতৰ ঝাৰখণ্ডৰ কৃষক ৰঞ্জিতৰ, যিয়ে ২০১৭ চনত নিজৰ ১৩ বছৰীয়া কন্যা কিৰণক তিনিজন পুৰুষৰ যৌন নিৰ্যাতনৰ পৰা ৰক্ষা পোৱাৰ পিছত ন্যায় বিচাৰি নিজৰ জীৱন-যুদ্ধ অব্যাহত ৰাখে।
- অস্কাৰ ২০২৫ৰ বাবে ভাৰতীয় ছবিক প্ৰতিনিধিত্ব কৰি অফিচিয়েল এণ্ট্ৰী লাভ কৰে লাপাতা লেডীজে।কিৰন ৰাওৰ দ্বাৰা পৰিচালিত লাপাতা লেডীজে শ্ৰেষ্ঠ আন্তৰ্জাতিক ফিচাৰ ফিল্ম শ্ৰেণীত ভাৰতক প্ৰতিনিধিত্ব কৰে। অৱশ্যে অস্কাৰ ২০২৫ৰ এই দৌৰত থমকি ৰয় এই ছবিখনে। এই ছবিত উল্লেখনীয় কাম কৰে স্পৰ্শ শ্ৰীবাস্তৱ, নীতাংশী গোৱেল আৰু প্ৰতিভা ৰত্নই।
