এতিয়া নেপাললৈ যোৱা ভাৰতীয় নাগৰিকে লগত পৰিচয় পত্ৰ লৈ যোৱাটো বাধ্যতামূলক। বৈধ পৰিচয় পত্ৰ অবিহনে কোনো ভাৰতীয় নাগৰিকক নেপালত প্ৰৱেশ কৰিবলৈ দিয়া নহ’ব বুলি স্পষ্ট কৰি দি সীমা অতিক্ৰম কৰি চলাচলৰ ক্ষেত্ৰত নতুন নিষেধাজ্ঞা ৰূপায়ণ কৰিছে নেপাল প্ৰশাসনে। একেদৰে নেপালৰ পৰা ভাৰতলৈ যোৱাসকলেও পৰিচয় পত্ৰ দেখুৱাব লাগিব।
নেপাল চৰকাৰৰ এই সিদ্ধান্তৰ পিছতে শনিবাৰে হঠাতে ভাৰত-নেপাল সীমান্ত কঠোৰ হৈ পৰিল। যোগবাণী সীমান্তকে ধৰি কেইবাটাও সীমান্ত অঞ্চলত ID পৰীক্ষণ আৰম্ভ হোৱাৰ ফলত যাত্ৰী আৰু যান-বাহনৰ দীঘলীয়া শাৰীৰ সৃষ্টি হয়। নেপাল আৰক্ষীয়ে আধাৰ কাৰ্ড বা চৰকাৰে প্ৰদান কৰা অন্যান্য বৈধ আইডি থকাসকলকহে প্ৰৱেশৰ অনুমতি দিছিল। নথি-পত্ৰ নথকাসকলক সীমান্তৰ পৰাই উভতাই পঠিওৱা হয়।
কলকাতাৰ পৰা যোগবাণীলৈ যোৱা ৰে’লত অহা যাত্ৰীসকলেও স্ক্ৰীনিং প্ৰক্ৰিয়াৰ মাজেৰে পাৰ হ’বলগীয়া হৈছিল। নেপাললৈ যোৱা বৃহৎ সংখ্যক লোকে দীৰ্ঘ সময় অপেক্ষা কৰিবলগীয়া হোৱাৰ ফলত সীমান্ত অঞ্চলত বিশৃংখলতাৰ সৃষ্টি হয়।
নেপালৰ মুখ্য জিলা দণ্ডাধীশ যুৱৰাজ কাটেলে কয় যে এতিয়া সীমান্ত পাৰ হ’বলৈ বৈধ পৰিচয় পত্ৰ দেখুওৱাটো বাধ্যতামূলক হ’ব। নিৰাপত্তাজনিত কাৰণত এই পদক্ষেপ লোৱা বুলি প্ৰশাসনে দাবী কৰিছে। বাহৰেইচৰ গাতে লাগি থকা নেপাল সীমান্তৰ সমীপত বসবাস কৰা মধেচী জনগোষ্ঠীয়ে এই সিদ্ধান্তক লৈ ক্ষোভ প্ৰকাশ কৰিছে। নেপালৰ যমুনহা গাঁৱৰ লগতে ইয়াৰ আশে-পাশে থকা অঞ্চলৰ বাসিন্দাসকলে দৈনিক চলাচল কঠিন হৈ পৰা বুলি জনাইছে। নেপালী সশস্ত্ৰ আৰক্ষী বাহিনীৰ কঠোৰ পৰীক্ষা আৰু সোধা-পোছাৰ ফলত স্থানীয় লোকৰ মাজত উত্তেজনা বৃদ্ধি পাইছে।
ইফালে ভাৰতীয় নিৰাপত্তা সংস্থাসমূহো নেপাল সীমান্তৰ মাজেৰে চীনা নাগৰিকৰ সন্দেহজনকভাৱে চলাচল কৰাৰ খবৰ পোৱাৰ পিছত সষ্টম হৈ পৰিছে। বিহাৰৰ সীমান্তৱৰ্তী জিলাসমূহৰ ভিতৰত বেটিয়া, পূৱ চম্পাৰণ, সীতামড়ী, দৰভংগা, মধুবনীকে ধৰি আৰক্ষী আৰু বিশেষ নিৰাপত্তা বাহিনীক হোটেল, লজ, সন্দেহজনক কাৰ্যকলাপ নিৰীক্ষণ কৰিবলৈ নিৰ্দেশ দিয়া হৈছে।
শেহতীয়াকৈ চীনৰ হুনান প্ৰদেশৰ ঝৌ হুয়ানক বৈধ নথি-পত্ৰ অবিহনে ভাৰতত প্ৰৱেশ কৰি থকা অৱস্থাত আৰাৰিয়া জিলাৰ জোগবানী সীমান্তত ধৰা পৰে। তেওঁ নেপালী নম্বৰ প্লেট থকা স্কুটীৰে সীমান্ত পাৰ হ’বলৈ চেষ্টা কৰিছিল, তাৰ পিছতে নিৰাপত্তা সংস্থাই তেওঁক সোধা-পোছা কৰিবলৈ আৰম্ভ কৰে।
