মানুহৰ একাগ্ৰতা, কষ্ট, দায়বদ্ধতা আৰু ত্যাগ, এই শব্দ কেইটাৰ লগত যাৰ নিবিড়তা আছে, যি জনে অন্তঃকৰণেৰে হৃদয়ংগম কৰিব পাৰিছে, জীৱন যুঁজখনত সাহসেৰে আগবাঢ়িবলৈ শিকিছে তেওঁৰ বাবে সকলোৱেই সম্ভব। দৰিদ্ৰতা বা অৰ্থ তেওঁৰ বাবে সমস্যা মুঠেই নহয়। এই কথাকেই প্ৰমাণ কৰিছে ভাৰতীয় ক্ৰিকেট দলৰ দুই তাৰকা ক্ৰিকেটাৰ হাৰ্দিক পাণ্ডিয়া আৰু ক্ৰুনাল পাণ্ডিয়াই।
হাৰ্দিক আৰু ক্ৰুনালে নিজৰ ভোক নিবাৰণৰ বাবে তিনিবছৰ খাইছিল কেৱল মেগী। হাৰ্ভাৰ্ড বিশ্ববিদ্যালয়ৰ বাৰ্ষিক ভাৰত সন্মিলনত অংশ লৈ এই কথা ৰাজহুৱা কৰিছে মুম্বাই ইণ্ডিয়ানছৰ স্বত্তাধিকাৰী নীতা আম্বানীয়ে।
তেওঁ কয়, ‘এদিন আমাৰ কেম্পত দুজন ক্ষীণকায় ল’ৰা আহিছিল। মই তেওঁলোকৰ লগত কথা পাতিছিলো। ল’ৰা দুজনে কয় যে তেওঁলোকে তিনি বছৰৰ পৰা মেগী আৰু নুডলছৰ বাহিৰে আন একো খাদ্য গ্ৰহণ কৰা নাই, কাৰণ তেওঁলোকৰ ধনৰ অভাৱ। কিবা ডাঙৰ কৰি দেখুৱাবলৈ তেওঁলোকৰ মাজত থকা আবেগ, উৎসাহ আৰু ক্ষুধা দেখিছিলো৷ সেই দুই ভাতৃ আছিল হাৰ্দিক পাণ্ডিয়া আৰু ক্ৰুনাল পাণ্ডিয়া। ২০১৫ চনত মই হাৰ্দিক পাণ্ডিয়াক নিলামত ৮.৫০ লাখ টকাত ক্ৰয় কৰিছিলো আৰু আজি তেওঁ মুম্বাই ইণ্ডিয়ানছৰ অধিনায়ক।’
২০১৫ চনত মুম্বাইৰ ইণ্ডিয়ানছৰ হৈ খেলা হাৰ্দিক পাণ্ডিয়াই ২০১৬ চনত ভাৰতীয় দলত সুযোগ পাইছিল। তেওঁৰ ভাতৃ ক্ৰুনাল পাণ্ডিয়াৰ ২০১৮ চনত টি-২০ আৰু ২০২১ চনত এদিনীয়া দলত অভিষেক ঘটিছিল।
উল্লেখ্য যে, সৰ্বাধিকবাৰ অৰ্থাত পাঁচবাৰ আই পি এলৰ খিতাপ দখল কৰিছে মুম্বাই ইণ্ডিয়ানছে। দলটোৱে ২০১৩, ২০১৫, ২০১৭, ২০১৯ আৰু ২০২০ চনত খিতাপ জয় কৰিছিল। কেৱল এয়াই নহয় ২০১১ আৰু ২০১৩ চনত অৰ্থাত দুবাৰ চেম্পিয়নছ লীগ টি-২০ৰ খিতাপো দখল কৰিছিল।
ইতিমধ্যে আই পি এলৰ আগন্তুক ছিজনৰ সূচী প্ৰকাশ পাইছে। ২৩ মাৰ্চত দলটোৱে ছিজনৰ প্ৰথমখন মেচ খেলিব। দলক নেতৃত্ব প্ৰদান কৰিব হাৰ্দিক পাণ্ডিয়াই।
