অসমৰ মুখ্যমন্ত্ৰী হিমন্ত বিশ্ব শৰ্মাই কংগ্ৰেছৰ বিৰুদ্ধে পুনৰ এক ডাঙৰ অভিযোগ উত্থাপন কৰিছে। তেওঁ কয় যে ৰাজ্যত কংগ্ৰেছৰ শাসন কালত কোনো লোকে উৎকোচ নিদিয়াকৈ চৰকাৰী চাকৰি পোৱা নাছিল।
কংগ্ৰেছক ভ্ৰষ্টাচাৰী আখ্যা দি মুখ্যমন্ত্ৰী শৰ্মাই কয় যে তেওঁৰ কাৰ্যকালত দুই লাখ যুৱক-যুৱতীক কৰ্মসংস্থাপন প্ৰদান কৰাটোৱেই তেওঁৰ মূল উদ্দেশ্য।
সোমবাৰে মুখ্যমন্ত্ৰীগৰাকীয়ে এক অনুষ্ঠানত অংশগ্ৰহণ কৰি দাবী কৰে যে তেওঁ মুখ্যমন্ত্ৰী হোৱাৰ পিছৰে পৰা ৰাজ্যখনত ১.৪ লাখ যুৱক-যুৱতীয়ে চাকৰি লাভ কৰিছে।
সোমবাৰে মুখ্যমন্ত্ৰী শৰ্মাই আত্মনিৰ্ভৰ আঁচনিৰ শুভাৰম্ভণি কৰি দিয়া ভাষণত কয়, ‘কংগ্ৰেছৰ শাসনকালত যুৱক-যুৱতীসকলে উৎকোচ নিদিয়াকৈ চৰকাৰী চাকৰি পাব বুলি বিশ্বাস কৰা নাছিল। কম দৰমহাৰ চাকৰিৰ বাবেও এক কোটি টকা পৰ্যন্ত উৎকোচ দিব লগা হৈছিল।‘
তেওঁ অভিযোগ কৰে যে আগতে কংগ্ৰেছ চৰকাৰে অসম লোকসেৱা আয়োগৰ অধ্যক্ষ পদৰ বাবে এনে লোকক বাছনি কৰিছিল, যাৰ পৰা চাকৰিৰ বিনিময়ত ধন সংগ্ৰহ কৰিব পাৰিছিল।
মুখ্যমন্ত্ৰী শৰ্মাই আৰু কয়, ‘এতিয়া কাঁইটীয়া যুগৰ অন্ত পৰিছে। এতিয়া আমি উৎকোচ নোলোৱাকৈ স্বচ্ছভাৱে নিযুক্তি পৰীক্ষা অনুষ্ঠিত কৰিবলৈ সক্ষম হৈছো। লক্ষ্যতকৈ (এক লাখ) অধিক ১.৪ লাখ যুৱকক চৰকাৰী চাকৰি দিয়া হৈছে। ২০২৬ চনৰ ভিতৰত দুই লাখ যুৱক-যুৱতীক চাকৰিৰ সুবিধা প্ৰদানৰ লক্ষ্য নিৰ্ধাৰণ কৰা হৈছে’।
উল্লেখ্য যে, ২০২১ চনৰ বিধানসভা নিৰ্বাচনৰ সময়ত বিজেপিয়ে অসমত প্ৰতি বছৰে এক লাখ লোকক চৰকাৰী চাকৰি দিয়াৰ প্ৰতিশ্ৰুতি দিছিল। অৱশ্যে পিছত তেওঁ নিজৰ বক্তব্য শুধৰাই কৈছিল যে এই সংখ্যা পাঁচ বছৰৰ বাবে।
