২০২৫ বৰ্ষৰ বাজেটৰ বাবে মাজত আৰু কেইটামান দিন বাকী। এইবাৰৰ বাজেট বহু দিশত বিশেষ হ’ব বুলি গণ্য কৰা হৈছে। বিশেষকৈ ক্ষুদ্ৰ বিনিয়োগকাৰী আৰু সাধাৰণ মানুহৰ বাবে। আচলতে এই বাজেট হ’ব মোদী চৰকাৰৰ তৃতীয় কাৰ্যকালৰ দ্বিতীয়খন পূৰ্ণাংগ বাজেট। বৰ্তমানৰ বিত্তমন্ত্ৰী নিৰ্মলা সীতাৰমণে দাখিল কৰিব এই বাজেট।
বিত্তমন্ত্ৰী হিচাপে নিৰ্মলা সীতাৰমনৰ এইখন হ’ব অষ্টম বাজেট। কিন্তু, বিত্তমন্ত্ৰী হিচাপে প্ৰথমবাৰৰ বাবে দেশৰ আগত বাজেট দাখিল কৰা মহিলাগৰাকীৰ বিষয়ে জানেনে। ইয়াৰ বিষয়ে বিতংভাৱে জানো আহক।
দেশৰ প্ৰথমগৰাকী মহিলা বিত্তমন্ত্ৰী
দেশৰ প্ৰথমগৰাকী মহিলা বিত্তমন্ত্ৰী আছিল ইন্দিৰা গান্ধী। এইটো ১৯৬৯ চনৰ কথা। এই সময়ত দেশত ইন্দিৰা গান্ধীৰ চৰকাৰ আছিল আৰু তেতিয়াৰ উপ-প্ৰধানমন্ত্ৰী মোৰাৰজী দেশাইৰ লগত বিত্ত মন্ত্ৰালয় আছিল। কিন্তু, যেতিয়া মোৰাৰজী দেশাইয়ে ইন্দিৰা গান্ধীৰ বিৰুদ্ধে বিদ্ৰোহ কৰিছিল, তেতিয়া ১৯৬৯ চনৰ ১২ নৱেম্বৰত কংগ্ৰেছ দলে তেওঁক দলৰ পৰা বহিষ্কাৰ কৰিছিল।
মোৰাৰজী দেশাইৰ বিদায়ৰ পিছত বিত্তমন্ত্ৰীৰ পদ খালী হৈ পৰে। তিনিমাহৰ পিছত দেশৰ বাজেট দাখিল কৰিব লাগিছিল, এনে পৰিস্থিতিত দলটোৱে নতুন মুখ এখনক বিশ্বাস কৰাটো সঠিক বুলি নাভাবিলে।
ইন্দিৰা গান্ধীয়ে প্ৰধানমন্ত্ৰী হৈ থকাৰ সময়তে বিত্ত মন্ত্ৰালয়ো নিজৰ লগত ৰাখিছিল। তাৰ পিছত ১৯৭০ চনৰ ২৮ ফেব্ৰুৱাৰীৰ তাৰিখ, য’ত এগৰাকী মহিলাই সংসদত দেশৰ বাজেট দাখিল কৰিছিল। ইন্দিৰা গান্ধীয়ে প্ৰথম আৰু শেষবাৰৰ বাবে বাজেট দাখিল কৰিছিল, যিটো ইতিহাসত লিপিবদ্ধ হৈ ৰয়। ইন্দিৰা গান্ধীৰ পিছত পূৰ্ণকালীন মহিলা বিত্তমন্ত্ৰী হোৱা প্ৰথমগৰাকী মহিলা নিৰ্মলা সীতাৰমণ।
১৯৭০ চনৰ ২৮ ফেব্ৰুৱাৰীত সন্ধিয়া ৫ বজাত যেতিয়া ইন্দিৰা গান্ধীয়ে বাজেট দাখিল কৰিবলৈ সংসদত প্ৰৱেশ কৰিছিল, তেতিয়া কংগ্ৰেছৰ সাংসদসকলে তেওঁক হাতচাপৰিৰে আদৰণি জনাইছিল। বাজেট পঢ়িবলৈ আৰম্ভ কৰি হঠাতে তেওঁ ৰৈ গৈছিল আৰু কৈছিল ক্ষমা কৰিব। এই কথা কোৱাৰ লগে লগে সদনত নিস্তব্ধতা পৰে। মানুহে ভাবিছিল ইন্দিৰা গান্ধীয়ে কিয় ক্ষমা বিচাৰিলে।
অৱশ্যে কেইছেকেণ্ডমানৰ পাছত ইন্দিৰা গান্ধীয়ে হাঁহি এটা মাৰি ক’লে, ‘ক্ষমা কৰিব, এইবাৰ মই চিগাৰেট খোৱা লোকৰ পকেটত বোজা দিম।’ আচলতে ইন্দিৰা গান্ধীয়ে সাধাৰণ বাজেটত ৰাজহ বৃদ্ধি কৰাৰ পৰিকল্পনা কৰিছিল। অৰ্থাৎ চিগাৰেটত কৰ প্ৰায় ৭ গুণ বৃদ্ধি কৰিছিল। যি কৰ পূৰ্বে ৩% আছিল সেয়া ২২% লৈ বৃদ্ধি কৰা হৈছিল।
