পাকিস্তানত ২৪ নৱেম্বৰত কাৰাগাৰত থকা প্ৰাক্তন প্ৰধানমন্ত্ৰী ইমৰাণ খানক মুকলি কৰি দিয়াৰ বাবে পাকিস্তান তেহৰিক-ই-ইনছাফ (পিটিআই)পাৰ্টিয়ে প্ৰতিবাদ সাব্যস্ত কৰে। এই প্ৰতিবাদ হিংসাত্মক ৰূপত পৰিণত হয়। আৰক্ষীয়ে গ্ৰেপ্তাৰ কৰে ৪ হাজাৰৰো অধিক পিটিআই সমৰ্থকক। তদুপৰি দেশত বিদ্যালয় বন্ধ কৰাৰ লগতে ইণ্টাৰনেটও বন্ধ কৰি দিয়া হৈছিল।
ভাৰতৰ চুবুৰীয়া দেশ পাকিস্তানত ২৪ নৱেম্বৰত ৰাজধানী ইছলামবাদত প্ৰতিবাদ সাব্যস্ত কৰা হয়। এই প্ৰতিবাদ বন্ধ কৰিবলৈ চৰকাৰে আৰক্ষী বাহিনী মোতায়েন কৰিছিল। এগৰাকী নিৰাপত্তা বিষয়াই জনোৱা মতে, পাকিস্তান আৰক্ষীয়ে ৪ হাজাৰৰো অধিক সমৰ্থকক গ্ৰেপ্তাৰ কৰিছে। কাৰাবন্দী প্ৰাক্তন প্ৰধানমন্ত্ৰী ইমৰাণ খানক মুক্তিৰ দাবীত এই প্ৰতিবাদ সাৱ্যস্ত কৰা হৈছিল।
পঞ্জাৱ প্ৰদেশৰ নিৰাপত্তা বিষয়া শ্বাহিদ নৱাজে সমৰ্থকসকলক গ্ৰেপ্তাৰ কৰাটো নিশ্চিত কৰিছে, য’ত ৫জন সাংসদও আছিল। এই বিক্ষোভ বন্ধ কৰিবলৈ চৰকাৰে কেইবাটাও পদক্ষেপ গ্ৰহণ কৰে। কৰ্তৃপক্ষই ইছলামবাদক জাহাজৰ কণ্টেইনাৰেৰে বন্ধ কৰি দিয়ে আৰু পঞ্জাৱ আৰু খাইবাৰ পখতুনখোৱা প্ৰদেশৰ পিটিআইৰ দুৰ্গসমূহৰ সৈতে চহৰখনক সংযোগ কৰা ডাঙৰ পথসমূহ বন্ধ কৰি দিয়ে।
পিটিআই দলৰ প্ৰাক্তন মুৰব্বী ইমৰাণ খানে ১৩ নৱেম্বৰত এই প্ৰতিবাদৰ কথা ঘোষণা কৰিছিল, তেওঁ কয় যে- এইয়া দাসত্বৰ শিকলি ভাঙিবলৈ কৰা প্ৰতিবাদ। পিটিআই দলে চৰকাৰৰ ওপৰত হেঁচা প্ৰয়োগ কৰিবলৈ চেষ্টা কৰিছে, যাতে তেওঁলোকৰ জেলত থকা নেতাসকলক মুকলি কৰি দিব পাৰে। ইমৰাণ খান যোৱা এবছৰ ধৰি ১৫০টাতকৈও অধিক গোচৰত কাৰাগাৰত বন্দী হৈ আছে।
২৫ৰ পৰা ২৭ নৱেম্বৰলৈ পাকিস্তান ভ্ৰমণলৈ যাব বেলাৰুছৰ ৰাষ্ট্ৰপতি আলেকজেণ্ডাৰ লুকাচেংকো। ২৪ নৱেম্বৰত তেওঁৰ প্ৰতিনিধি দলৰ ৮০ জন লোক দেশত উপস্থিত হয়। ইয়াৰ বাবেই পাকিস্তান চৰকাৰে পিটিআইৰ এই প্ৰতিবাদ বন্ধ কৰিবলৈ যৎপৰোনাস্তি চেষ্টা চলায়।
এই প্ৰতিবাদ হিংসাত্মক ৰূপ ধাৰণ কৰাৰ লগতে আৰক্ষী আৰু পিটিআইৰ সমৰ্থকৰ মাজত সংঘৰ্ষৰ সৃষ্টি হয়। কন্দুৱা গেছও নিৰ্গত হয়। সাৱধানতা অৱলম্বন কৰি চৰকাৰে ইছলামবাদ আৰু ৰাৱালপিণ্ডিত ইণ্টাৰনেট, মোবাইল সেৱা আৰু ৰাজহুৱা পৰিবহণ বন্ধ কৰি দিয়ে। সোমবাৰে ইছলামবাদ আৰু পঞ্জাৱ প্ৰদেশৰ সকলো বিদ্যালয়-মহাবিদ্যালয় বন্ধ কৰাৰ নিৰ্দেশ দিয়া হৈছে।
লগতে বিক্ষোভ বন্ধ কৰিবলৈ বৃহৎ সংখ্যক নিৰাপত্তা বাহিনী মোতায়েন কৰা হয়। সংসদ আৰু উচ্চতম ন্যায়ালয়কে ধৰি সকলো গুৰুত্বপূৰ্ণ চৰকাৰী ভৱনৰ নিৰাপত্তাৰ বাবে বিশেষ ব্যৱস্থা কৰা হৈছে। মহানগৰীত ১৪৪ ধাৰা জাৰি কৰাৰ লগতে দুমাহৰ বাবে জনসমাৱেশ নিষিদ্ধ কৰা হয়।
পাকিস্তানী সংবাদ মাধ্যমৰ মতে, ইমৰাণ খানৰ পিটিআই দলৰ প্ৰতিবাদৰ বাবে বিগত ১৮ মাহত চৰকাৰী ৰাজকোষত ২.৭ বিলিয়ন পিকেআৰতকৈ অধিক লোকচান হৈছে। ইয়াৰ ভিতৰত ৰাজহুৱা আৰু ব্যক্তিগত সম্পত্তি ধ্বংস কৰাৰ খৰচো অন্তৰ্ভুক্ত।
