আজি প্ৰধানমন্ত্ৰীৰ ১২৩ সংখ্যক ‘মন কী বাত’ অনুষ্ঠানত ভাষণ দি প্ৰধানমন্ত্ৰী মোদীয়ে আন্তঃৰাষ্ট্ৰীয় যোগ দিৱসৰ সফলতাৰ কথা উল্লেখ কৰে। ইয়াৰ লগতে তেওঁ জৰুৰীকালীন অৱস্থাৰ ৫০ বছৰীয়া জয়ন্তী উপলক্ষে নিজৰ চিন্তাও ব্যক্ত কৰে।
লগতে অসমৰ বড়োলেণ্ডৰ কথা উল্লেখ কৰি প্ৰধানমন্ত্ৰী মোদীয়ে কয় যে, বড়োলেণ্ডে আজি নতুন ৰূপ লৈ দেশৰ সন্মুখত থিয় দিছে। ইয়াৰ যুৱক-যুৱতীসকলৰ শক্তি আৰু আত্মবিশ্বাস আটাইতকৈ বেছি দেখা যায় ফুটবল খেলপথাৰত।
বৰ্তমান বড়োলেণ্ড চি ই এম কাপৰ আয়োজন কৰা হৈছে। এইখন কেৱল প্ৰতিযোগিতা নহয়, ই একতা আৰু আশাৰ উদযাপনলৈও পৰিণত হৈছে। ৩ হাজাৰ ৭০০ টাতকৈও অধিক দল, প্ৰায় ৭০ হাজাৰ খেলুৱৈ, আৰু বহু সংখ্যক কন্যায়ো এইবোৰত অংশগ্ৰহণ কৰিছে।
এই পৰিসংখ্যাই বড়োলেণ্ডৰ এক বৃহৎ পৰিৱৰ্তনৰ কাহিনী দাঙি ধৰিছে। বড়োলেণ্ডে এতিয়া দেশৰ ক্ৰীড়া মানচিত্ৰত নিজৰ জিলিকনি বৃদ্ধি কৰিছে।
প্ৰধানমন্ত্ৰীয়ে লগতে কয় যে, এটা সময় আছিল যেতিয়া সংগ্ৰাম এই ঠাইখনৰ পৰিচয় আছিল। তেতিয়া ইয়াত যুৱক-যুৱতীসকলৰ বাবে বাট সীমিত হৈ পৰিছিল। কিন্তু আজি তেওঁলোকৰ চকুত নতুন সপোন আৰু অন্তৰত আত্মনিৰ্ভৰশীলতাৰ সাহস দেখা পোৱা গৈছে।
ইয়াৰ পৰা অহা ফুটবল খেলুৱৈসকলে এতিয়া ডাঙৰ স্তৰত নিজৰ নাম উজলাইছে। হলিচৰণ নাৰ্জাৰী, দুৰ্গা বড়ো, অপূৰ্ণ নাৰ্জাৰী, মনবীৰ বসুমতাৰী – এইবোৰ কেৱল ফুটবল খেলুৱৈৰ নাম নহয় – এওঁলোকেই হৈছে বড়োলেণ্ডক খেলপথাৰৰ পৰা ৰাষ্ট্ৰীয় মঞ্চলৈ লৈ যোৱা নতুন প্ৰজন্মৰ পৰিচয়।
