ইছলামিক সন্ত্ৰাসবাদীয়ে জম্মু-কাশ্মীৰৰ পেহেলগামত সংঘটিত কৰা নাৰকীয় ঘটনাক লৈ দুখ প্ৰকাশ কৰিছে কাটাৰৰ আমিৰ তামিম বিন হামাদ আল-থানীয়ে। সন্ত্ৰাসবাদ বিৰোধী যুদ্ধত কাটাৰে ভাৰতক সম্পূৰ্ণ সহায় আৰু সমৰ্থন কৰাৰো আশ্বাস প্ৰদান কৰে। প্ৰধানমন্ত্ৰী নৰেন্দ্ৰ মোদীৰ সৈতে ফোনযোগে হোৱা কথা-বতৰাত এই প্ৰতিশ্ৰুতি দিয়ে আল-থানীয়ে।
তেওঁ লগতে কয় যে, সন্ত্ৰাসবাদ বিৰোধী অভিযানত আমি ভাৰতৰ লগত আছো।
বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে কয়, “আজি কাটাৰৰ আমিৰ শ্বেইখ তামিম বিন হামাদ আল-থানীয়ে প্ৰধানমন্ত্ৰী মোদীৰ সৈতে টেলিফোনযোগে কথা পাতিছে। পেহেলগামত সংঘটিত সন্ত্ৰাসবাদী আক্ৰমণত নিহতসকলৰ পৰিয়ালৰ প্ৰতি শোক প্ৰকাশ কৰে।’
তেওঁ লগতে সন্ত্ৰাসবাদৰ বিৰুদ্ধে ভাৰতৰ যুঁজ আৰু দোষীক ন্যায় দিবলৈ ভাৰতে গ্ৰহণ কৰা সকলো কাৰ্যকলাপৰ প্ৰতি সম্পূৰ্ণ সমৰ্থন প্ৰকাশ কৰে। প্ৰধানমন্ত্ৰী মোদীয়ে তামিম বিন হামাদ আল-থানীক সংহতি আৰু সমৰ্থনৰ স্পষ্ট বাৰ্তাৰ বাবে ধন্যবাদ জ্ঞাপন কৰে।
কাটাৰৰ উপৰি পেহেলগামত হোৱা আক্ৰমণক ৰাছিয়া, আমেৰিকা, ইজৰাইল, ব্ৰিটেইন, জাৰ্মানী আদিৰ লগতে আন বহু ৰাষ্ট্ৰই দুখ আৰু নিন্দা প্ৰকাশ কৰিছে।
