ৰাজস্থান ৰয়েলছৰ তাৰকা বেটছমেন ৰিয়ান পৰাগে কলকাতাৰ ইডেন গাৰ্ডেনত হোৱা আজিৰ খেলত আলোড়নৰ সৃষ্টি কৰে। আই পি এল ২০২৫ৰ এই ৫৩ সংখ্যক মেচত কলকাতা নাইট ৰাইডাৰ্ছৰ বিৰুদ্ধে ৰিয়ানে একেৰাহে ৬টা বলত ছয় ৰান সংগ্ৰহ কৰে। পৰাগৰ এই বিস্ফোৰক শৈলী দেখা যায় ইনিংছৰ ১৩ অভাৰত, যেতিয়া তেওঁ ম’ইন আলীৰ এটা অভাৰত ৫টা ছয় কৰে। ইয়াৰ লগে লগে ৰিয়ানে ক্ৰীছ গেইল আৰু ৰিংকু সিঙৰ দৰে শক্তিশালী বেটছমেনৰ ক্লাবত প্ৰৱেশ কৰে।
প্ৰথমে বেটিং কৰি কলকাতা নাইট ৰাইডাৰ্ছে ৰাজস্থানক ২০৭ ৰানৰ লক্ষ্য প্ৰদান কৰি মাত্ৰ ১ ৰানৰ ব্যৱধানত জয়লাভ কৰে। ৰাজস্থানৰ দলটোৱে ৭১ ৰানত ৫ উইকেট হেৰুৱাই বিপদত পৰে যদিও ৰিয়ান পৰাগে বিস্ফোৰক বেটিং আৰম্ভ কৰে। ইনিংছৰ ত্ৰয়োদশ অভাৰত বলিং কৰিবলৈ অহা স্পিনাৰ ম’ইন আলীক ৫ টাকৈ ছয় মাৰি ৰিয়ানে আলোড়নৰ সৃষ্টি কৰে। ইয়াৰ পিছত বৰুণ চক্ৰৱৰ্তীয়ে বল কৰা পৰৱৰ্তী অভাৰৰ বলত ৰিয়ানে পুনৰ ছয় কৰে। এইদৰে তেওঁ একেৰাহে ৬টা বলৰ সন্মুখীন হৈ ৬টা ছয় কৰে।
এই শক্তিশালী হিটিংৰ জৰিয়তে ৰিয়ান পৰাগে আই পি এলত এটা অভাৰত ৫টা ছয় কৰা ৫ম বেটছমেন হিচাপে পৰিগণিত হয়। ২০১২ চনত প্ৰথমবাৰৰ বাবে এই কৃতিত্ব অৰ্জন কৰিছিল ক্ৰীছ গেইলে, ৰাহুল শৰ্মাৰ অভাৰত ৫টা ছয় কৰিছিল। এই কৃতিত্ব অৰ্জন কৰিবলৈ সক্ষম হোৱা আন বেটছমেনসকল হৈছে ৰাহুল তেৱাটিয়া, ৰবীন্দ্ৰ জাডেজা আৰু ৰিংকু সিং।
আই পি এলত এটা অভাৰত ৫টা ছয় কৰা বেটছমেন-
- ক্ৰীছ গেইল বনাম ৰাহুল শৰ্মা, ২০১২
- ৰাহুল টেৱাটিয়া বনাম এছ কট্ৰেল, ২০২০
- ৰবীন্দ্ৰ জাডেজা বনাম হৰ্শাল পেটেল, ২০২১
- ৰিংকু সিং বনাম যশ দয়াল, ২০২৩
- ৰিয়ান পৰাগ বনাম ম’ইন আলী, ২০২৫*
উজ্জ্বল বেটিং কৰি থকা ৰিয়ান পৰাগক শতক কৰিবলৈ মাত্ৰ ৫ ৰান বাকী থকা অৱস্থাত হৰ্ষিত ৰানাৰ বলিঙত ৯৫ ৰানত নিজৰ ইনিংছ সামৰে। ৰিয়ানে ৪৫টা বলত ৯৫ ৰানৰ এক উজ্জ্বল ইনিংছ খেলে। ৰিয়ানৰ এই ইনিংছত ৬টা চাৰি আৰু ৮টা ছয় অন্তৰ্ভুক্ত হয়। অৱশ্যে তেওঁৰ অধিনায়কত্বৰ ইনিংছে ৰাজস্থানক জয়ী কৰিব নোৱাৰিলে। ২০৭ৰ লক্ষ্যৰ লৈ ৰাজস্থান দলে ২০৫ ৰানত নিজৰ ইনিংছ সামৰে আৰু ১ ৰানৰ অতি ঘনিষ্ঠ ব্যৱধানত পৰাস্ত হয়।
