গুজৰাটৰ চাবৰকান্থা জিলাত সংঘটিত এক ভয়ংকৰ পথ দুৰ্ঘটনাত ৭ জন লোকৰ কৰুণ মৃত্যু হৈছে। তীব্ৰবেগী এখন চাৰিচকীয়া বাহনে এখন ট্ৰাকৰ পিছফালত খুন্দা মৰাৰ ফলতেই সংঘটিত হয় এই শিহৰণকাৰী দুৰ্ঘটনাটো।
এই ভয়ংকৰ দুৰ্ঘটনাটোত এজন ব্যক্তি গুৰুতৰভাৱে আহত হৈছে। শ্যামলা জী মন্দিৰ দৰ্শন কৰি আহমেদাবাদলৈ উভতি আহি থকা সময়তে ৰাতিপুৱা প্ৰায় ৬ বজাত সংঘটিত হয় এই দুৰ্ঘটনা।
ঘটনাস্থলৰ পৰা লাভ কৰা তথ্য অনুসৰি, গাড়ীখনৰ গতিবেগ অতি বেছি আছিল, যাৰ বাবে গাড়ীখনে ট্ৰাকখনৰ সৈতে সংঘৰ্ষত লিপ্ত হয়।
দুৰ্ঘটনাটো ইমানেই ভয়ংকৰ আছিল যে গাড়ীখনৰ ভিতৰত থকা লোকসকলক উদ্ধাৰ কৰোতে যথেষ্ট অসুবিধাৰ সন্মুখীন হৈছিল। গাড়ীখনত মুঠ ৮ জন লোক আছিল আৰু ইয়াৰে মাত্ৰ এজন লোকৰহে কথমপি প্ৰাণ ৰক্ষা পৰিছে।
মৃতদেহসমূহ উলিয়াই আনিবলৈ আৰক্ষীৰ লগতে উদ্ধাৰকাৰী দলে বিশেষ যন্ত্ৰৰ সহায়ত গাড়ীখন কাটিবলগীয়া হোৱা বুলিও জানিব পৰা গৈছে।
ইফালে, কি কাৰণত দুৰ্ঘটনাটো সংঘটিত হ’ল সেয়া জানিবলৈ আৰক্ষীয়ে ঘটনাস্থান পৰিদৰ্শন কৰাৰ লগতে স্থানীয় বাসিন্দা আৰু প্ৰত্যক্ষদৰ্শীৰ পৰাও তথ্য সংগ্ৰহ কৰি আছে।
