বিপদত পৰিব পাৰে ভাৰতীয় ক্ৰিকেট দলৰ প্ৰাক্তন ক্ৰিকেটাৰ ৰবীন উথাপ্পা। ক্ৰিকেটাৰগৰাকীৰ বিৰুদ্ধে জাৰি কৰা হৈছে গ্ৰেপ্তাৰী পৰোৱানা। প্ৰভিডেণ্ট ফাণ্ড অৰ্থাত কৰ্মচাৰী ভৱিষ্য নিধি (ইপিএফ)ৰ জালিয়াতিৰ বাবে বিপদত পৰিব পাৰে প্ৰাক্তন বিশ্বজয়ী ক্ৰিকেটাৰগৰাকী।
প্ৰাপ্ত খবৰ অনুসৰি, প্ৰাক্তন ক্ৰিকেটাৰ ৰবীন উথাপ্পাৰ বিৰুদ্ধে এটি কাপোৰ কোম্পানীৰ কৰ্মচাৰীৰ প্ৰভিডেণ্ট ফাণ্ডত জমা কৰিবলগীয়া ধন জমা নকৰাৰ অভিযোগ উত্থাপন হৈছে। ২৭ ডিচেম্বৰৰ ভিতৰত প্ৰায় ২৪ লাখ টকা জমা দিব লাগিব উথাপ্পাই।
ৰবীন উথাপ্পা চেঞ্চুৰীজ লাইফষ্টাইল ব্ৰেণ্ড প্ৰাইভেট লিমিটেড নামৰ কাপোৰ কোম্পানীৰ ডিৰেক্টৰ পদত অধিষ্ঠিত হৈ আছে। এই কোম্পানীটোৰ ২৩ লাখ ৩৬ হাজাৰ ৬০২ টকা নিয়ম অনুসৰি প্ৰভিডেণ্ট ফাণ্ডত জমা দিয়া নাছিল।
এই ঘটনা সন্দৰ্ভত বেংগালুৰু আঞ্চলিক পি এফৰ আয়ুক্ত সদক্ষৰী গোপাল ৰেড্ডীয়ে কয় যে বিগত ৪ ডিচেম্বৰত ৰবীন উথাপ্পাৰ বিৰুদ্ধে গ্ৰেপ্তাৰী পাৰোৱানা জাৰি কৰা হৈছিল।
উল্লেখ্য যে, কোম্পানীটোৰ কৰ্মচাৰীৰ দৰমহাৰ পৰা ধন কৰ্তন কৰাৰ পিছতো প্ৰভিডেণ্ট ফাণ্ডত ধন জমা নিদিয়াৰ অভিযোগ উত্থাপন হৈছে উথাপ্পাৰ বিৰুদ্ধে। যাৰ বাবে প্ৰভিডেণ্ট ফাণ্ড অথৰিটিয়ে কৰ্মচাৰীসকলৰ ধনৰাশি মোকলাই দিব পৰা নাই।
কোম্পানীৰ কৰ্মচাৰীসকলে অভিযোগ কৰা অনুসৰি, প্ৰতিমাহে কোম্পানীয়ে পিএফৰ ধন কৰ্তন কৰে, কিন্তু তেওঁলোকৰ পিএফ একাউণ্টত ধন জমা হোৱা নাই। কৰ্মচাৰীসকলৰ এই অভিযোগৰ পিছতেই উথাপ্পাৰ বিৰুদ্ধে জালিয়াতিৰ গোচৰ ৰুজু কৰা হৈছে।
ইফালে যদিহে ২৭ ডিচেম্বৰৰ ভিতৰত প্ৰাক্তন ক্ৰিকেটাৰগৰাকীয়ে প্ৰভিডেণ্ট ফাণ্ডত উক্ত ধনৰাশি জমা নিদিয়ে তেন্তে তেওঁক গ্ৰেপ্তাৰ কৰিবলৈ আৰক্ষীক নিৰ্দেশ প্ৰদান কৰা হৈছে বুলি জানিব পৰা গৈছে।
