বৃহস্পতিবাৰে পুৱা ৰাছিয়াই পুনৰবাৰ ইউক্ৰেইনৰ ওপৰত ভয়াবহ আক্ৰমণ চলায়। ড্ৰ’ন আৰু মিছাইলেৰে কৰা আক্ৰমণত ৪টি শিশুসহ মুঠ ১৫ জন লোকৰ মৃত্যু হৈছে। ইউক্ৰেইনৰ ৰাষ্ট্ৰপতি জেলেনস্কিয়ে প্ৰতিক্ৰিয়া প্ৰকাশ কৰি কয় যে যুদ্ধৰ অন্ত পেলোৱাৰ বাবে চলি থকা কূটনৈতিক আলোচনাৰ মাজতে ৰাছিয়াৰ এয়া উত্তৰ।
এই আক্ৰমণত ইউৰোপীয় সংঘৰ মিছনৰ মুখ্য কাৰ্যালয় আৰু ব্ৰিটিছ কাউন্সিলকে ধৰি সাতখন জিলাৰ অট্টালিকা ক্ষতিগ্ৰস্ত হয়। ইউক্ৰেইনৰ সেনাই জনোৱা মতে, সমগ্ৰ দেশতে ৰাছিয়াই নিক্ষেপ কৰা প্ৰায় ৬০০ ড্ৰ’নৰ ভিতৰত ৫৬৩টা আৰু ৩১টা ক্ষেপণাস্ত্ৰৰ ভিতৰত ২৬টা এয়াৰ ডিফেন্স চিষ্টেমে ধ্বংস কৰে।
ইউক্ৰেইনৰ সেনাই জনোৱা মতে, ৰাছিয়াই মুঠ ১৩টা স্থানত আক্ৰমণ চলাইছে। ৰাষ্ট্ৰীয় গ্ৰীড অপাৰেটৰ উক্ৰেনাৰ্গোৱে কয় যে এই আক্ৰমণত সম্পত্তি যথেষ্ট ক্ষতিগ্ৰস্ত হৈছে।
ৰাছিয়াৰ আক্ৰমণ সন্দৰ্ভত ইউক্ৰেইনৰ ৰাষ্ট্ৰপতি জেলেনস্কিয়ে ‘এক্স’ত পোষ্ট কৰি লিখিছে, ‘ৰাছিয়াই আলোচনাৰ টেবুলত বহাৰ পৰিৱৰ্তে বেলিষ্টিক মিছাইল বাছি লয়। যুদ্ধৰ অন্ত পেলোৱাৰ পৰিৱৰ্তে হত্যাকাণ্ড চলাই থাকিব বিচাৰে।’
উল্লেখ্য যে, ৰাছিয়া-ইউক্ৰেইনৰ মাজত বিগত কেইবাবছৰ ধৰি চলি থকা যুদ্ধৰ অন্ত পেলাবৰ বাবে আমেৰিকাৰ ৰাষ্ট্ৰপতি ড’নাল্ড ট্ৰাম্পে প্ৰয়াস অব্যাহত ৰখাৰ মাজতে বৃহস্পতিবাৰে পুৱা ইউক্ৰেইনৰ ওপৰত ৰাছিয়াই কৰা ভয়ংকৰ আক্ৰমণে শান্তি আলোচনাত যে ব্যাঘাত জন্মাব সেয়া স্পষ্ট হৈ পৰিল।
