বিহাৰত চলি থকা ভোটাৰ তালিকাৰ বিশেষ পুনৰীক্ষণক লৈ শাসকীয় পক্ষ আৰু বিৰোধীৰ মাজত তীব্ৰ বাক্যবাণ অব্যাহত থকাৰ মাজতে সৰ্বোচ্চ ন্যায়ালয়ে আজি এই সন্দৰ্ভত এক ডাঙৰ মন্তব্য কৰিছে। বিহাৰত ভোটাৰ তালিকাৰ পৰা কৰ্তন হোৱা ৬৫ লাখ ভোটাৰৰ নাম জিলা পৰ্যায়ৰ ৱেবছাইটত উপলব্ধ কৰাৰ নিৰ্দেশ প্ৰদান কৰিছে সৰ্বোচ্চ ন্যায়ালয়ে।
বিহাৰৰ খচৰা ভোটাৰ তালিকাৰ পৰা আঁতৰোৱা ৬৫ লাখ লোকৰ সবিশেষ মঙলবাৰৰ ভিতৰত ৱেবছাইটত আপলোড কৰিবলৈ নিৰ্বাচন আয়োগক নিৰ্দেশ দিছে উচ্চতম ন্যায়ালয়ে। ইয়াৰ উপৰিও সেই নামবোৰ আঁতৰোৱাৰ কাৰণো উল্লেখ কৰিবলৈ কোৱা হৈছে।
উচ্চতম ন্যায়ালয়ে লগতে কয় যে বুথ পৰ্যায়ৰ বিষয়াসকলেও নাম আঁতৰোৱা ভোটাৰৰ তালিকা প্ৰদৰ্শন কৰিব।
জিলা পৰ্যায়ৰ ৱেবছাইটৰ উপৰিও এই তথ্য স্থানীয় সংবাদ মাধ্যম আৰু চৰকাৰী ছ’চিয়েল মিডিয়া চেনেলতো ব্যাপকভাৱে প্ৰচাৰ কৰা হ’ব। ইয়াৰ দ্বাৰা সাধাৰণ লোকে নিজৰ তথ্য সহজে জানিব পাৰিব আৰু ইয়াৰ ফলত গণতান্ত্ৰিক প্ৰক্ৰিয়াত স্বচ্ছতা বৃদ্ধি পাব।
ভোটাৰ তালিকাৰ বিশেষ পুনৰীক্ষণ সন্দৰ্ভত সৰ্বোচ্চ ন্যায়ালয়ত চলি থকা শুনানিৰ তৃতীয় দিনা আজি এই গুৰুত্বপূৰ্ণ নিৰ্দেশনা প্ৰদান কৰাৰ লগতে পৰৱৰ্তী শুনানি অহা ২২ আগষ্টত হ’ব।
