সতৰ্কবাণী অবিহনে ঘাইপথত হঠাতে ব্ৰেক মৰাৰ ফলত যদি দুৰ্ঘটনা সংঘটিত হয় তেন্তে ইয়াক চালকৰ গাফিলতি বুলি গণ্য কৰা হ’ব। এখন আবেদনৰ শুনানি গ্ৰহণ কৰি আজি উচ্চতম ন্যায়ালয়ে এই গুৰুত্বপূৰ্ণ মন্তব্য কৰে।
মঙলবাৰে ন্যায়াধীশ সুধাংশু ধুলিয়া আৰু অৰবিন্দ কুমাৰৰ বিচাৰপীঠে কয় যে ব্যক্তিগত তথা জৰুৰীকালীন অৱস্থাৰ বাবে হ’লেও ঘাইপথৰ মাজত হঠাতে গাড়ীৰ ব্ৰেক মৰাটো উচিত নহয় কাৰণ ইয়াৰ ফলত ঘাইপথেৰে অহা যোৱা কৰা আন লোকৰ বাবে ভয়ংকৰ বিপদ নামি আহিব পাৰে।
ন্যায়াধীশ ধুলিয়াই কয় যে ঘাইপথত বাহনসমূহ তীব্ৰ গতিত থাকিব পাৰে আৰু যদি কোনো চালকে নিজৰ বাহনখন ৰখাব বিচাৰে তেন্তে সেই পথেৰে চলি থকা আন বাহনসমূহক জনাই দিয়া বা সংকেত দিয়াটো তেওঁৰ দায়িত্ব।
অভিযান্ত্ৰিক শিক্ষাৰ্থী এছ মহম্মদ হাকিমে দাখিল কৰা আবেদনৰ শুনানি গ্ৰহণ কৰি এই সিদ্ধান্ত প্ৰদান কৰে সৰ্বোচ্চ ন্যায়ালয়ে।
উল্লেখ্য যে, ২০১৭ চনত কয়ম্বটুৰত সংঘটিত হোৱা এক পথ দুৰ্ঘটনাত বাঁওভৰিখন হেৰুৱাইছিল হাকিমে। এখন চাৰিচকীয়া বাহনে হঠাতে ব্ৰেক মৰাৰ ফলত হাকিমৰ মটৰ চাইকেলখনে বাহনখনত খুন্দা মাৰিছিল। এই দুৰ্ঘটনাত তেওঁ পথত চিটিকি পৰাত পিছফালৰ পৰা অহা এখন বাছে তেওঁৰ ভৰিৰ ওপৰেৰে উঠি যায়। এই ভয়ংকৰ ঘটনাৰ পিছতে হাকিমে বাঁও ভৰিখন হেৰুৱাইছিল।
এই কৰুণ ঘটনাৰ পিছতে হাকিমে সৰ্বোচ্চ ন্যায়ালয়ত আবেদন দাখিল কৰিছিল। এই আবেদনৰ শুনানি গ্ৰহণ কৰি আজি সৰ্বোচ্চ ন্যায়ালয়ে এই সিদ্ধান্ত প্ৰদান কৰে। ইয়াৰ উপৰি দুৰ্ঘটনাৰ বাবে চাৰিচকীয়া বাহনখন আৰু বাছখনক জগৰীয়া কৰি ১.১৪ কোটি টকাৰ ক্ষতিপূৰণ দিয়াৰো নিৰ্দেশ প্ৰদান কৰে। দুয়োখন বাহনৰ বীমা কোম্পানীয়ে চাৰিসপ্তাহৰ ভিতৰত এই অনুদান দিব লাগিব।
