গুজৰাটৰ চি আই ডি শাখাই ভাৰতৰ ৪ জন ক্ৰিকেটাৰলৈ প্ৰেৰণ কৰিছে চমন। ৪৫০ কোটি টকাৰ চিট ফাণ্ড কেলেংকাৰীত সাঙোৰ খাইছে ভাৰতীয় ক্ৰিকেট দলৰ তাৰকা ক্ৰিকেটাৰ শুভমন গিল, ৰাহুল তেৱেতিয়া, মোহিত শৰ্মা আৰু ছাই সুদৰ্শনৰ নাম।
এই বৃহৎ কেলেংকাৰী বিষয়টো সন্দৰ্ভত সোধা পোচাৰ বাবে চি আই ডিয়ে এই চাৰিজন ক্ৰিকেটাৰক চমন প্ৰেৰণ কৰিছে।
উল্লেখ্য যে, বিনিয়োগ জালিয়াতি সন্দৰ্ভত ভূপেন্দ্ৰ সিং জালা নামৰ এজন লোকক জেৰা কৰাৰ পিছতে এই কেলেংকাৰীৰ সৈতে নাম সাঙোৰ খাইছে এই চাৰিজন ক্ৰিকেটাৰৰ। জালাই চি আই ডিৰ আগত স্বীকাৰ কৰিছে যে এই চাৰিজন ক্ৰিকেটাৰে বিনিয়োগ কৰা ধন ঘূৰাই দিয়া নাই।
তদন্তকাৰী বিষয়াসকলৰ মতে, আই পি এলত গুজৰাট টাইটানছৰ অধিনায়কত্ব কৰা শুভমন গিলে এই পঞ্জি/প্ৰৱঞ্চনা আঁচনিখনত ১.৯৫ কোটি টকা বিনিয়োগ কৰিছিল। তেওঁৰ উপৰি আন তিনিজন ক্ৰিকেটাৰেও ধন বিনিয়োগ কৰিছিল।
ইতিমধ্যে ভূপেন্দ্ৰ সিং জালাৰ একাউণ্ট চোৱা চিতা কৰা ৰুছিক মেহতা নামৰ এজনক গ্ৰেপ্তাৰ কৰিছে চি আই ডিৰ বিষয়াই।
এক সংবাদ মাধ্যমৰ বাতৰি অনুসৰি, ‘যদি এই গোচৰত মেহতাক দোষী সাব্যস্ত কৰা হয়, তেন্তে কঠোৰ ব্যৱস্থা গ্ৰহণ কৰা হ’ব। আমি একাউণ্টেণ্টৰ এটা দল প্ৰস্তুত কৰিছো, যিয়ে জালাৰ দ্বাৰা পৰিচালিত অনানুষ্ঠানিক একাউণ্ট আৰু লেনদেনৰ তদন্ত কৰিব। অনানুষ্ঠানিক বহীসমূহ চিআইডিয়ে জব্দ কৰিছে আৰু সোমবাৰৰ পিছত বিভিন্ন ঠাইত অবিৰতভাৱে অভিযান চলাই থকা হৈছে।’
ইয়াৰ পূৰ্বেও বিষয়াসকলে প্ৰকাশ কৰিছিল যে জালাই ৬ হাজাৰ কোটি টকাৰ কেলেংকাৰী সংঘটিত কৰিছিল যদিও পিছত এই ধনৰাশি ৪৫০ কোটি টকালৈ হ্ৰাস হয়।
বিষয়াসকলে জাৰি কৰা এক বিবৃতিত কোৱা হৈছে, ‘জালাই এখন অনানুষ্ঠানিক একাউণ্ট চোৱা চিতা কৰি আছিল, যিখন চি আই ডিৰ দলে জব্দ কৰিছে। এই একাউণ্টত ৫২ কোটি টকাৰ লেনদেন পোৱা গৈছে। তদন্ত অনুসৰি এই কেলেংকাৰীৰ মুঠ ধন আনুমানিক ৪৫০ কোটি টকা বুলি ধাৰণা কৰা হৈছে যদিও অব্যাহত থকা অভিযানৰ পিছত এই ধন আৰু অধিক বৃদ্ধি পাব পাৰে।’
