দিল্লীৰ অৰুণ জেটলি ষ্টেডিয়ামত চলি থকা ভাৰত আৰু ৱেষ্ট ইণ্ডিজৰ মাজৰ দ্বিতীয়খন টেষ্টৰ দ্বিতীয় দিনা ভাৰতীয় দলৰ অধিনায়ক শুভমন গিলৰ বেটৰ পৰা আহে এটা দৰ্শনীয় ইনিংছ। চতুৰ্থ স্থানত বেটিং কৰিবলৈ অহা গিলে ১৯৬টা বলত ১২৯ ৰানৰ শতকীয় ইনিংছ খেলে। তেওঁৰ ইনিংছটোত আছিল ১৬টা চাৰি আৰু দুটা ছয়।
অপৰাজিত এই ১২৯ ৰানৰ ইনিংছটো আছিল তেওঁৰ টেষ্ট কেৰিয়াৰৰ দশম শতক। আজিৰ এই শতকীয় ইনিংছটোৰ জৰিয়তে তেওঁ কেইবাটাও কৃতিত্ব গঢ়িবলৈ সক্ষম হয়।
জানো আহক আজিৰ এই ইনিংছটোৰ জৰিয়তে গিলে গঢ়া চাৰিটা অভিলেখ
বিশ্ব টেষ্ট চেম্পিয়নশ্বিপৰ ইতিহাসত ভাৰতৰ হৈ সৰ্বাধিক শতকীয় ইনিংছ খেলা ক্ৰিকেটাৰত পৰিণত হৈছে গিল। দিল্লী টেষ্টৰ পূৰ্বে তেওঁ প্ৰাক্তন অধিনায়ক ৰোহিত শৰ্মা (৯)ৰ সৈতে যুটীয়াভাৱে প্ৰথম স্থানত আছিল। কিন্তু আজি গিলে শতক সম্পূৰ্ণ কৰাৰ লগে লগে ৰোহিত শৰ্মাক অতিক্ৰম কৰি প্ৰথম স্থানত উপনীত হয়।
১০- শুভমন গিল
০৯- ৰোহিত শৰ্মা
০৭- যশস্বী জয়ছৱাল
০৬- ঋষভ পন্ত
০৬- কে এল ৰাহুল
অধিনায়ক হিচাপে ১২টা ইনিংছৰ পিছত সৰ্বাধিক ৫০+ স্ক’ৰ
ভাৰতৰ অধিনায়ক হিচাপে ১২টা টেষ্ট ইনিংছৰ পিছত সৰ্বাধিক বাৰ ৫০+ স্ক’ৰ কৰা তৃতীয়গৰাকী বেটাৰত পৰিণত হৈছে গিল। এই ক্ষেত্ৰত তেওঁ অতিক্ৰম কৰে বিৰাট কোহলী আৰু বিজয় হাজাৰেক। প্ৰথম স্থানত আছে এম এছ ধোনী।
০৮- এম এছ ধোনী
০৭- সুনীল গাভাস্কাৰ
০৬- শুভমন গিল
০৫- বিৰাট কোহলী
০৫- বিজয় হাজাৰে
২৬ বছৰ বা তাতকৈ কম বয়সত আন্তঃৰাষ্ট্ৰীয় ক্ৰিকেটত ভাৰতৰ হৈ সৰ্বাধিক শতক অৰ্জন
২৬ বছৰ বা তাতকৈ কম বয়সত সৰ্বাধিক আন্তঃৰাষ্ট্ৰীয় শতক অৰ্জন কৰা তৃতীয়গৰাকী ভাৰতীয় বেটছমেনত পৰিণত হয় শুভমন গিল। প্ৰথম স্থানত আছে শচীন তেণ্ডুলকাৰ।
৪৭ শতক – শচীন তেণ্ডুলকাৰ
৩৪ শতক – বিৰাট কোহলী
১৯ শতক – শুভমন গিল
১৭ শতক – বীৰেন্দ্ৰ সেহৱাগ
বিৰাট কোহলীৰ সমতা স্থাপন
ভাৰতীয় ক্ৰিকেটত ‘প্ৰিন্স’ নামেৰে পৰিচিত গিলে অধিনায়ক হিচাপে এটা কেলেণ্ডাৰ বছৰত পাঁচটা টেষ্ট শতক অৰ্জন কৰি প্ৰাক্তন অধিনায়ক বিৰাট কোহলীক স্পৰ্শ কৰে। কিং কোহলীয়ে ক্ৰমে ২০১৭ আৰু ২০১৮ চনত অধিনায়ক হিচাপে পাঁচটা শতক অৰ্জন কৰিছিল।
বিৰাট কোহলী – ২০১৭
বিৰাট কোহলী – ২০১৮
শুভমন গিল – ২০২৫
