পশ্চিম বংগ আৰু বাংলাদেশৰ সীমান্তত থকা হাকিমপুৰ সীমান্ত আউটপোষ্টৰ সমীপ (উত্তৰ ২৪ পৰগনা জিলা)ত বিগত কেইদিনমানৰ পৰা অস্বাভাৱিক কাৰ্যকলাপ দেখা গৈছে। ৰাস্তাৰ দাঁতিত বহি থকা পুৰুষ, মহিলা, শিশুৰ মুখত ভয় দেখা গৈছে।
আশ্ৰয় লৈ থকা গৃহৰ পৰা ওলাই বাংলাদেশলৈ পুনৰ উভতি যোৱাৰ ইংগিত দি তেওঁলোকে বেগ, কম্বল, বাকচ লৈ ফুৰিছে। বিষয়াসকলৰ মতে, এই বিপৰীত প্ৰব্ৰজন শেহতীয়াকৈ দ্ৰুতগতিত বৃদ্ধি পাইছে। অৰ্থাৎ এইসকল লোকে প্ৰথমে অবৈধভাৱে ভাৰতত প্ৰৱেশ কৰি এতিয়া পুনৰ নিজৰ দেশলৈ উভতি যাবলৈ চেষ্টা কৰিছে।
এই ঘটনাই উত্তৰ ২৪ পৰগনা জিলাত ৰাজনৈতিক বিতৰ্কৰ সৃষ্টি কৰিছে। বছৰ বছৰ ধৰি কলকাতাৰ উপকণ্ঠ অঞ্চলত আত্মগোপন কৰি থকা প্ৰায় ৫০০ অবৈধ বাংলাদেশী নাগৰিকে বিশেষ সংক্ষিপ্ত পুনৰীক্ষণ অভিযানৰ আশংকাত বাংলাদেশলৈ উভতি যোৱাৰ চেষ্টা কৰিছে।
সেইসকলৰ ভিতৰত এগৰাকী মহিলাই কয় যে, তেওঁ দহ বছৰ পূৰ্বে নিউ টাউনলৈ আহিছিল। এন আৰ চিৰ কথা শুনি তেওঁ চিন্তিত হৈছে। কিয়নো তেওঁৰ হাতত কোনো ভাৰতীয় নথি-পত্ৰ নাই। বি এছ এফৰ তথ্য অনুসৰি বিগত এসপ্তাহত ৪০০ৰো অধিক লোক হাকিমপুৰত উপস্থিত হৈছে।
১৮ নৱেম্বৰলৈকে সীমান্তত আৱদ্ধ হৈ থকা লোকৰ সংখ্যা ৫০০ অতিক্ৰম কৰিছিল।এই লোকসকল মূলতঃ সাতখিৰা আৰু জশোৰ জিলাৰ স্থানীয় লোক, যিসকলে ঘৰুৱা শ্ৰমিক হিচাপে বা কলকাতাৰ ক্ষুদ্ৰ ব্যৱসায়ত কাম কৰিছিল। বি এছ এফৰ তথ্য অনুসৰি এই বছৰত এইটোৱেই হৈছে সৰ্বাধিক বিপৰীতমুখী প্ৰব্ৰজন।
বি এছ এফে বাহন আৰু মটৰ চাইকেলৰ ওপৰত কঠোৰ নিৰীক্ষণ অব্যাহত ৰাখিছে। বি এছ এফৰ তথ্য অনুসৰি পূৰ্বে দৈনিক ১০-২০ জন লোক উভতিছিল যদিও বৰ্তমান প্ৰায় ১৫০-২০০ লোকে উভতাৰ চেষ্টা চলাইছে। ইয়াৰে বেছিভাগৰে আইনী নথি-পত্ৰৰ অভাৱ। এছ আই আৰৰ সৈতে জড়িত আশংকাই অবৈধ প্ৰব্ৰজনকাৰীৰ মাজত ভয় আৰু অনিশ্চয়তা বৃদ্ধি কৰিছে, যাৰ ফলত এই ওলোটা প্ৰব্ৰজন হৈছে।
