শুকুৰবাৰে সন্ধিয়া পশ্চিম বংগৰ বিৰভূম জিলাস্থিত শিল কুঁৱৰীত হোৱা ভয়ংকৰ দুৰ্ঘটনাত ৬ গৰাকী লোকৰ মৃত্যু হোৱাৰ খবৰ লাভ কৰা গৈছে। নালহাটী আৰক্ষী থানাৰ অন্তৰ্গত বাহাদুৰপুৰ শিল কুঁৱৰীত সংঘটিত হৈছে এই কৰুণ ঘটনা।
প্ৰত্যক্ষদৰ্শীৰ মতে, শ্ৰমিকসকলে শিল আঁতৰাই থকাৰ সময়তে সংঘটিত বিস্ফোৰণৰ ফলত শিলৰ কুঁৱৰীৰ এটা বৃহৎ অংশ ভাঙি পৰে। ঘটনা সংঘটিত হোৱাৰ সময়ত শ্ৰমিকসকলে নিৰাপদ স্থানত আশ্ৰয় লোৱাৰ কোনো সুযোগেই লাভ নকৰিলে।
দুৰ্ঘটনাৰ সময়ত প্ৰায় ১০ৰ পৰা ১২জন শ্ৰমিক সেই স্থানত উপস্থিত আছিল। ঘটনাটোত পাঁচজন শ্ৰমিকৰ থিতাতেই মৃত্যু হোৱাৰ লগতে গুৰুতৰভাৱে আহত হোৱা আন এজন শ্ৰমিকৰ হাস্পতাললৈ নিয়াৰ সময়ত মৃত্যু ঘটে।
আনহাতে দুৰ্ঘটনাটোৰ ফলত আহত হোৱা চাৰিগৰাকী শ্ৰমিকক উদ্ধাৰ কৰি ৰামপুৰহাট মেডেকিলে কলেজত ভৰ্তি কৰোৱা হৈছে। সম্প্ৰতি আৰক্ষী আৰু উদ্ধাৰকাৰী দল ঘটনাস্থলত উপস্থিত হৈ আৰু কোনো শ্ৰমিক আৱদ্ধ হৈ আছে নেকি সেয়া তদন্ত কৰি আছে।
ইফালে, শিল কুঁৱৰীটোৱে সকলো নিয়ম মানি কাম-কাজ চলাই আছিল নে অবৈধভাৱে চলাই আছিল সেয়াও আৰক্ষীয়ে বৰ্তমান তদন্ত আৰম্ভ কৰিছে।
