ছুডানত সংঘটিত হৈছে এক ভয়ংকৰ বিমান দুৰ্ঘটনা। দেশখনৰ ওমদুৰমান চহৰত এখন সামৰিক বিমান দুৰ্ঘটনাগ্ৰস্ত হোৱাত অতি কমেও ৪৬ জন লোকৰ মৃত্যু হয়। বুধবাৰে দেশখনৰ প্ৰশাসনে এই তথ্য প্ৰদান কৰে।
এটা আন্তঃৰাষ্ট্ৰীয় সংবাদ সংস্থাই প্ৰকাশ কৰা প্ৰতিবেদন অনুসৰি এই দুৰ্ঘটনাত সেনা জোৱান আৰু সাধাৰণ নাগৰিকৰ মৃত্যু হৈছে। দুৰ্ঘটনাৰ আঁৰৰ মূল কাৰণ সন্দৰ্ভত কোনো তথ্য পোৱা নাই।
ছুডানী সেনাৰ প্ৰতিবেদন অনুসৰি মঙলবাৰে ওমদুৰমানৰ উত্তৰত অৱস্থিত ৱাডি ছায়েদনা বিমানঘাটিৰ পৰা উৰা মৰাৰ সময়তে সেনাবাহিনীৰ এণ্টন’ভ বিমানখন দুৰ্ঘটনাগ্ৰস্ত হয়।
দেশখনৰ স্বাস্থ্য মন্ত্ৰালয়ে জনোৱা অনুসৰি দুৰ্ঘটনাটোত অতি কমেও ৪৬ জন লোকৰ মৃত্যু হৈছে, আৰু মৃত লোকসমূহৰ দেহ ওমদুৰমানৰ নাউ হাস্পতাললৈ প্ৰেৰণ কৰা হৈছে। ইয়াৰ উপৰি এই দুৰ্ঘটনাত আহত হোৱা ১০ জন লোকৰ চিকিৎসা চলি আছে।
উল্লেখ্য যে, গৃহ যুদ্ধৰে জৰ্জৰিত ছুডান। সেনা আৰু অৰ্ধ সামৰিক বাহিনীৰ এই যুদ্ধত ৰাষ্ট্ৰখন যেন পৰিণত হৈছে এক নৰকুণ্ডলৈ। বিগত দুটা বছৰে ধৰি চলি থকা এই গৃহযুদ্ধত প্ৰাণ হেৰুৱাইছে অসংখ্য সাধাৰণ নাগৰিকে। দেশখনৰ অস্থিৰ পৰিৱেশৰ মাজতে এই ধৰণৰ ভয়ংকৰ বিমান দুৰ্ঘটনা নিশ্চিতভাৱে দেশখনৰ বাবে অতি দুখৰ খবৰ।
