ৰেণুকাস্বামী হত্যাকাণ্ডৰ গোচৰত কানাড়া অভিনেতা দৰ্শন আৰু আন কেইজন অভিযুক্তক কৰ্ণাটক উচ্চ ন্যায়ালয়ে জামিন মঞ্জুৰ কৰাৰ ধৰণক লৈ অসন্তুষ্টি প্ৰকাশ কৰিছে উচ্চতম ন্যায়ালয়ে। উচ্চ ন্যায়ালয়ে অভিযুক্তক জামিন প্ৰদানৰ পদ্ধতিক লৈও প্ৰশ্ন উত্থাপন কৰিছে সৰ্বোচ্চ ন্যায়ালয়ে।
উচ্চ ন্যায়ালয়ৰ এই সিদ্ধান্তক প্ৰত্যাহ্বান জনাইছে কৰ্ণাটক চৰকাৰে। দৰ্শনৰ উপৰি তেওঁৰ বন্ধু পবিত্ৰ গৌড়াও এই গোচৰৰ মূল অভিযুক্ত।
ইণ্ডিয়া টুডেৰ এক প্ৰতিবেদন অনুসৰি যোৱা বছৰৰ জুন মাহত ৰেনুকাস্বামীক অপহৰণ, নিৰ্যাতন আৰু তাৰ পিছত হত্যাৰ অভিযোগত অভিনেতা দৰ্শনক গ্ৰেপ্তাৰ কৰা হৈছিল।
বৃহস্পতিবাৰে সমগ্ৰ গোচৰৰ শুনানি গ্ৰহণ কৰি উচ্চতম ন্যায়ালয়ে এই ৰায় সংৰক্ষিত কৰি ৰাখিছে। ইয়াৰ আগৰবাৰৰ শুনানিত আদালতে উচ্চ ন্যায়ালয়ৰ সিদ্ধান্তক লৈ প্ৰশ্ন উত্থাপন কৰিছিল।
আজি শুনানি গ্ৰহণ কৰি ন্যায়াধীশ জে বি পাৰ্দিৱালা আৰু ন্যায়াধীশ আৰ মহাদেৱনৰ বিচাৰপীঠে উচ্চ ন্যায়ালয়ৰ দৰে ভুল নকৰে বুলি উল্লেখ কৰি কয়, ‘প্ৰথমে আমি তদন্ত কৰিম আৰু তাৰ পিছত ৰায় ঘোষণা কৰিম।’
উচ্চতম ন্যায়ালয়ে মূল অভিযুক্ত পবিত্ৰ গৌড়াৰ অধিবক্তাক কয়, ‘আমি দোষী সাব্যস্ত বা দোষমুক্ত হোৱাৰ সন্দৰ্ভত কোনো ৰায় দিয়া নাই।’ আদালতে লগতে কয়, ‘উচ্চ ন্যায়ালয়ে যি ধৰণে ৰায় দিলে… অতি দুখজনক। উচ্চ ন্যায়ালয়ে আন গোচৰতো এনেদৰে ৰায় দিয়ে নেকি?’
উচ্চ ন্যায়ালয়ৰ এই নিৰ্দেশ সন্দৰ্ভত উচ্চতম ন্যায়ালয়ে কয় যে ই ন্যায়িক ক্ষমতাৰ বিকৃত ব্যৱহাৰ যেন লাগে। ট্ৰায়েল ক’ৰ্টে এই ভুল কৰিলে মানি ল’ব পাৰি, কিন্তু উচ্চ ন্যায়ালয়ৰ পৰা এনে কথা আশা কৰা নহয়।
সাক্ষীৰ বক্তব্য বাতিল কৰা সন্দৰ্ভতো প্ৰশ্ন উত্থাপন কৰে উচ্চতম ন্যায়ালয়ে। উচ্চ ন্যায়ালয়ে বাতিল কৰিছিল কিৰণ আৰু পুনীতৰ বক্তব্য। আদালতে কয় যে উচ্চ ন্যায়ালয়ে তেওঁলোকৰ বক্তব্যক বিশ্বাস কৰিব নোৱাৰি বুলি কেনেকৈ ধৰি লৈছিল।
