ৰাজ্যসভাৰ সাংসদ স্বাতী মালিৱালক আটক কৰিছে দিল্লী আৰক্ষীয়ে। দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱালৰ বাসগৃহৰ সন্মুখত স্বাতী মালিৱালে বিৰোধ প্ৰদৰ্শন কৰিবলৈ গৈ পেলাইছিল জাৱৰ। এই কাণ্ডৰ বাবেই আৰক্ষীয়ে তেওঁক আটক কৰে।
আৰক্ষীয়ে আটক কৰাৰ সময়ত স্বাতী মালিৱালে সংবাদ মাধ্যমৰ আগত কয় যে দিল্লী আজি জাৱৰৰ দমত পৰিণত হৈছে। কেজৰিৱালক আক্ৰমণ কৰি তেওঁ কয় যে মই তেওঁৰ আৰক্ষীক ভয় নকৰো।
জানিব পৰা অনুসৰি বিকাশপুৰীৰ পৰা সংগ্ৰহ কৰা জাৱৰ-জোঁথৰ কেজৰিৱালৰ ঘৰৰ বাহিৰত পেলাই দিবলৈ গৈছিল স্বাতী মালিৱাল। আন মহিলাসকলেও এই ক্ষেত্ৰত স্বাতী মালিৱালক সমৰ্থন কৰিছিল।
অভিনৱ প্ৰতিবাদ সাব্যস্ত কৰিবলৈ যোৱা মালিৱালে কয় যে কেজৰিৱালে দিল্লীক জাৱৰৰ ৰাজধানী কৰি তুলিছে। বিকাশপুৰীৰ পথটো চাফা কৰি সকলো জাবৰ-জোঁথৰ কেজৰিৱালৰ ঘৰত পেলাই দিয়া হ’ব।
কোনো দলৰ বিৰুদ্ধে এই প্ৰতিবাদ নহয় বুলি উল্লেখ কৰি স্বাতী মালিৱালে কয় যে আজি দিল্লীৰ অৱস্থা অতিকৈ বেয়া। দিল্লীৰ প্ৰতিটো কোণ আজি দুৰ্গন্ধময় পৰিৱেশেৰে বিৰাজ কৰিছে। ৰাস্তা-ঘাটৰ অৱস্থা শোচনীয়। কেজৰিৱাল এতিয়া সাধাৰণ জনতা হৈ থকা নাই.. তেওঁৰ দিল্লীৰ প্ৰকৃত বাস্তৱৰ কোনো ধাৰণা নাই।
উল্লেখ্য যে, অহা ৫ ফেব্ৰুৱাৰীত দিল্লীত অনুষ্ঠিত হ’ব বিধানসভা নিৰ্বাচন। নিৰ্বাচনৰ পূৰ্বে অৰবিন্দ কেজৰিৱাৰ বিৰুদ্ধে এইদৰে প্ৰতিবাদ সাব্যস্ত কৰা বিষয়টোৱে দিল্লীৰ ৰাজনীতিত ব্যাপক প্ৰভাৱ পেলোৱাৰ সম্ভাৱনা আছে।
