বিগত বৰ্ষৰ জুলাইত উত্তৰপ্ৰদেশৰ বাৰেলীৰ শ্বাহী থানা এলেকাৰ অন্তৰ্গত গৌছগঞ্জ গাঁৱত মুহৰৰাম শোভাযাত্ৰাৰ সময়ত দুটা সম্প্ৰদায়ৰ মাজত হিংসাত্মক ঘটনা সংঘটিত হয়। যাৰফলত একাংশ লোকে একে গাঁৱৰ বাসিন্দা হীৰালালৰ পুত্ৰ তেজপালক টানি নি মছজিদত সোমাই প্ৰহাৰ কৰি হত্যা কৰে।
এই ঘটনাৰ বাবেই সমগ্ৰ গাঁওখনতে উত্তেজনা বিয়পি পৰে। পৰিস্থিতি ইমানেই ভয়াৱহ হৈ পৰে যে, আৰক্ষীয়ে কেইবাখনো থানা আৰু পিএচি বাহিনী মোতায়েন কৰিবলগীয়া হয়।
এই ঘটনাৰ পিছতে আৰক্ষীয়ে ব্যৱস্থা গ্ৰহণ কৰি ৫১জন অভিযুক্তক গ্ৰেপ্তাৰ কৰি জেললৈ প্ৰেৰণ কৰে। লগতে ১৪জন অভিযুক্তৰ ঘৰত বুলড’জাৰ চলায়। এই পৰিস্থিতিৰ মাজতে এটা বিশেষ সম্প্ৰদায়ৰ ৪০ টাতকৈও অধিক পৰিয়ালে গাঁও এৰি কেইবামাহো পলাই ফুৰে।
পিছে এছ এছ পি অনুৰাগ আৰিয়াৰ নিৰ্দেশমৰ্মে, চি অ’ চিটি পংকজ শ্ৰীবাস্তৱৰ নেতৃত্বত ১১টা পৰিয়ালক ঘৰলৈ ওভোতাই পঠিওৱা হয়। লগতে আৰক্ষীয়ে এই পৰিয়ালসমূহক আশ্বাস দিয়ে যে, তেওঁলোকৰ সুৰক্ষা নিশ্চিত কৰিবলৈ প্ৰশাসন সম্পূৰ্ণৰূপে সাজু।
উল্লেখ্য যে, বিগত ৬ মাহ এই পৰিয়াসসমূহে অতি কঠিনভাৱে জীৱন কটাবলগীয়া হৈছিল। ঘৰৰ পৰা আঁতৰি থকাৰ বাবে তেওঁলোকৰ শিশুৰ শিক্ষাৰ ওপৰতো প্ৰভাৱ পৰে।
এই গাঁওত শান্তি বজাই ৰাখিবলৈ আৰক্ষী প্ৰশাসনে কঠোৰ নিৰাপত্তাৰ ব্যৱস্থা কৰে। ২৪ ঘণ্টাই আৰক্ষী নিয়োজিত হৈ থকাৰ লগতে ৰখা হৈছে এটা স্থায়ী আৰক্ষী চকী। লগতে সমগ্ৰ অঞ্চলটোত স্থাপন কৰা হৈছে চিচিটিভি কেমেৰা। প্ৰ
এই সমগ্ৰ ঘটনাৰ পিছত প্ৰশাসনে কয় যে, বাকী থকা প্ৰব্ৰজিত পৰিয়ালবোৰকো অতিশীঘ্ৰে নিৰাপদে নিজ গৃহলৈ ওভোতাই অনা হ’ব।
