ভাৰতৰ বাহিৰেও নেপাল, ভূটান, মৰিচাছকে ধৰি সমগ্ৰ বিশ্বতে ভগৱান শিৱ মন্দিৰ আছে। ভাৰতত ভগৱান শিৱৰ ১২টা জ্যোতিৰ্লিংগ মন্দিৰ আছে। মহাশিৱৰাত্ৰিৰ দিনা লাখ লাখ লোকে এই মন্দিৰসমূহ দৰ্শন কৰে।
কিন্তু আপুনি জানেনে যে ভাৰততো বিশ্বৰ আটাইতকৈ ওখ শিৱ মন্দিৰ আছে?
এই মন্দিৰটো উত্তৰাখণ্ডৰ ৰুদ্ৰপ্ৰয়াগ জিলাত অৱস্থিত।যাৰ নাম হৈছে টুংগনাথ। টুংগনাথ মন্দিৰ বিশ্বৰ আটাইতকৈ ওখ শিৱ মন্দিৰ। এই মন্দিৰটো সমুদ্ৰপৃষ্ঠৰ পৰা প্ৰায় ৩,৬৮০ মিটাৰ (১২,০৭৩ ফুট) উচ্চতাত অৱস্থিত। ভগৱান শংকৰৰ এই মন্দিৰ পঞ্চকেদাৰ তীৰ্থস্থানত অন্তৰ্ভুক্ত।
এই টুংগনাথ মন্দিৰলৈ যাবলৈ হ’লে প্ৰথমে সোণপ্ৰয়াগলৈ যাব লাগিব। ইয়াৰ পিছত গুপ্তকাশী, উখিমাঠ, চোপ্ত হৈ টুংগনাথ মন্দিৰলৈ যাব পাৰি।
টুংগনাথৰ আক্ষৰিক অৰ্থ হৈছে ‘পৰ্বতৰ প্ৰভু। কিন্তু বিশ্বৰ সৰ্বোচ্চ শিৱ মন্দিৰৰ ইতিহাস মহাভাৰত যুগৰ সৈতে জড়িত। স্থানীয় ৰাইজৰ মতে, এই মন্দিৰৰ ভেটি মহাভাৰতৰ অৰ্জুনে স্থাপন কৰিছিল। শংকৰ ভগৱানক সন্তুষ্ট কৰিবলৈ পাণ্ডৱসকলে হাজাৰ হাজাৰ বছৰ আগতে এই মন্দিৰটো নিৰ্মাণ কৰিছিল বুলিও কোৱা হয়।
লোকবিশ্বাস অনুসৰি, মহাভাৰতৰ যুদ্ধত পাণ্ডৱসকলে তেওঁলোকৰ নিজৰ ভাই-গুৰুক হত্যা কৰিছিল, যাৰ বাবে তেওঁলোকৰ জীৱনত হত্যাৰ পাপ আছিল। ভগৱান শংকৰৰ পৰা ক্ষমা পালে তেওঁ সকলো পাপৰ পৰা মুক্ত হ’ব বুলি ঋষি ব্যাসে তেওঁলোকক কয়।যাৰ বাবে পঞ্চপাণ্ডৱে ভগৱান শংকৰৰ এই মন্দিৰত পূজা-অৰ্চনা কৰিছিল।
কোৱা হয় যে, টুংগনাথ মন্দিৰত ভগৱান শিৱৰ বাহু পোৱা গৈছিল। টুংগনাথৰ উপৰিও পঞ্চ কেদাৰত কেদাৰনাথ, ৰুদ্ৰনাথ, মধ্যমহেশ্বৰ আৰু কল্পেশ্বৰ মন্দিৰ অন্তৰ্ভুক্ত। কোৱা হয় যে, মহাশিৱৰাত্ৰিৰ দিনা এই মন্দিৰ দৰ্শন কৰিলে জীৱনৰ সকলো পাপ নাশ হয়। গতিকে মহাশিৱৰাত্ৰিৰ প্ৰাকমূহুৰ্তত ভগৱান শিৱৰ টুংগনাথ মন্দিৰ দৰ্শন কৰাটো অতি শুভ।
