শুকুৰবাৰে উত্তৰাখণ্ডৰ চামোলী জিলাত সংঘটিত হোৱা শিহৰণকাৰী হিমস্খলনৰ বাবে পথ নিৰ্মাণত নিয়োজিত ৪৭ জন শ্ৰমিক বিশাল বৰফৰ টুকুৰাৰ তলত আবদ্ধ হৈ পৰিছে। বিষয়াসকলে জনোৱা মতে, বদ্ৰীনাথৰ মানা গাঁৱৰ সীমান্তৱৰ্তী অঞ্চলত সীমান্ত পথ সংস্থাৰ নিৰ্মাণ কৰ্মীসকলে কাম কৰি আছিল। উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে কয় যে উদ্ধাৰ অভিযানত আইটিবিপি আৰু সেনা জোৱান নিয়োজিত হৈ আছে।
সীমান্ত পথ সংস্থা হৈছে ভাৰতীয় সশস্ত্ৰ বাহিনীক সহায় কৰা আৰু ভাৰতীয় সশস্ত্ৰ বাহিনীৰ অংশ। আৰক্ষী মুখ্য কাৰ্যালয়ৰ মুখপাত্ৰ আই জি নীলেশ আনন্দ ভৰাণে জনোৱা মতে, ৫৭ জন শ্ৰমিকৰ ভিতৰত ১০ জন শ্ৰমিকক উদ্ধাৰ কৰা হৈছে।
আনহাতে বিষয়াগৰাকীয়ে এটা সংবাদ সংস্থাৰ আগত কয়, ‘মানা সীমান্তৱৰ্তী অঞ্চলৰ সীমান্ত পথ সংস্থাৰ শিবিৰৰ সমীপত এক ভয়ংকৰ হিমস্খলন সংঘটিত হৈছে, য’ত পথ নিৰ্মাণত নিয়োজিত ৫৭ জন শ্ৰমিক আবদ্ধ হৈ আছে। ইয়াৰে ১০ জন শ্ৰমিকক উদ্ধাৰ কৰি সংকটজনক অৱস্থাত মানাৰ সমীপৰ সেনা শিবিৰলৈ প্ৰেৰণ কৰা হৈছে।’
ইফালে উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে কয় যে আই টি বি পি আৰু বি আৰ অ’ৰ দ্বাৰা উদ্ধাৰ অভিযান চলাই থকা হৈছে। তেওঁ লগতে হিমস্খলনত আৱদ্ধ হৈ থকা লোকসকলৰ সুৰক্ষাৰ বাবে প্ৰাৰ্থনা জনায়।
শেহতীয়াকৈ লাভ কৰা খবৰ অনুসৰি প্ৰচণ্ড তুষাৰপাতৰ বাবে আই টি বিপিয়ে উদ্ধাৰ অভিযান বন্ধ কৰি দিছে। মানা গাঁৱৰ নিজৰ শিবিৰলৈ উভতিছে আই টি বি পিৰ জোৱানসকল।
জিলা দণ্ডাধীশ সন্দীপ তিৱাৰীয়ে জনোৱা মতে, যি স্থানত হিমস্খলন সংঘটিত হৈছিল, তাত প্ৰায় আঠ ফুট বৰফ জমা হৈছে। বতৰ স্বাভাৱিক হ’লেই পুনৰ উদ্ধাৰ অভিযান আৰম্ভ কৰা হ’ব।
