২২ মাৰ্চৰ পৰা আৰম্ভ হ’ব ইণ্ডিয়ান প্ৰিমিয়াৰ লীগ ২০২৫ৰ প্ৰথমখন খেল। ১৮ সংখ্যক ছিজনৰ প্ৰথমখন মেচত মুখামুখি হ’ব কলকাতা নাইট ৰাইডাৰ্ছ আৰু ৰয়েল চেলেঞ্জাৰছ বেংগালুৰু। বিগত ছিজনত কলকাতাই দখল কৰিছিল আই পি এলৰ খিতাপ।
আনহাতে ৰাজস্থান ৰয়েলছে ২৩ মাৰ্চত আৰম্ভ কৰিব অভিযান। মেচখনত ৰাজস্থানৰ মুখামুখি হ’ব ছানৰাইজাৰ্ছ হায়দৰাবাদ। আগন্তুক ছিজনৰ বাবে ৰাজস্থান ৰয়েলছে মেগা নিলামত ক্ৰয় কৰিছিল ১৩ বছৰীয়া খেলুৱৈ বৈভৱ সূৰ্যবংশীক।
ভাৰতীয় ১৯ বছৰ অনুৰ্ধ্ব দলৰ হৈ কেইবাবাৰো উজ্জ্বল প্ৰদৰ্শন আগবঢ়াইছে বৈভৱে। অষ্ট্ৰেলিয়াৰ বিৰুদ্ধে এখন মেচত তেওঁ মাৰাত্মক প্ৰদৰ্শন আগবঢ়াইছিল। মাত্ৰ ৫৮টা বলত শতক অৰ্জন কৰিছিল বৈভৱে।
২০২৪ চনৰ ১৯ বছৰ অনুৰ্ধ্ব এছিয়া কাপতো বৈভৱে উজ্জ্বল প্ৰদৰ্শন আগবঢ়াইছিল। শ্ৰীলংকাৰ বিৰুদ্ধে ছেমি ফাইনেলত ভাৰতৰ হৈ অৰ্ধশতক অৰ্জন কৰে। এই খেলখনত ৩৬টা বলত বৈভৱে ৬৭ ৰান সংগ্ৰহ কৰিছিল। তেওঁৰ ইনিংছত আছিল ৬টা চাৰি আৰু ৫টা ছয়।
বিভিন্ন প্ৰতিযোগিতাত উজ্জ্বল প্ৰদৰ্শন আগবঢ়াই চৰ্চাত থকা বৈভৱ আই পি এলৰ আটাইতকৈ কম বয়সীয়া কোটিপতি ক্ৰিকেটাৰ। ৰাজস্থান ৰয়েলছে ১.১০ কোটি টকাত ক্ৰয় কৰিছিল বৈভৱক। বৈভৱৰ বেছ প্ৰাইজ আছিল ৩০ লাখ টকা।
উল্লেখ্য যে, বিহাৰত অনুষ্ঠিত ১৯ বছৰ অনুৰ্ধ্ব প্ৰতিযোগিতাত অপৰাজিত ৩৩২ ৰানৰ ইনিংছ খেলিছিল বৈভৱে। তেওঁ এই পৰ্যন্ত ৫ খন প্ৰথম শ্ৰেণীৰ মেচ খেলিছে। আনহাতে লিষ্ট এ মেচ খেলিছে ৬ খন। তেওঁ ১৩২ ৰান সংগ্ৰহ কৰিছে। আছে এটা অৰ্ধশতক। তেওঁ বিহাৰৰ হৈ বৰোদাৰ বিৰুদ্ধে ৭১ ৰানৰ ইনিংছ খেলিছিল।
