বহু প্ৰতিক্ষীত চেম্পিয়নছ ট্ৰফীৰ বাবে মাজত মাত্ৰ কেইটামান দিন। এই সন্মানীয় প্ৰতিযোগিতাখনৰ পূৰ্বে ভাৰতৰ হৈ ১৫২.৫ কিলোমিটাৰ গতিবেগেৰে বলিং কৰা বৰুণ এৰনে আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা ঘোষণা কৰিছে।
অৱসৰৰ কথা ঘোষণা কৰি ৩৫ বৰ্ষীয় বেগী বলাৰগৰাকীয়ে ছ’চিয়েল মিডিয়াযোগে নিজৰ অনুভৱ ব্যক্ত কৰে।
তেওঁ লিখিছে, ‘বিগত ২০ বছৰে মই বেগী বলিঙৰ ৰোমাঞ্চ অনুভৱ কৰিছো। অপৰিসীম কৃতজ্ঞতাৰে আজি মই আনুষ্ঠানিকভাৱে আন্তঃৰাষ্ট্ৰীয় ক্ৰিকেটৰ পৰা বিদায় লৈছো। ভগৱান, বন্ধু-বান্ধৱী, প্ৰশিক্ষক আৰু অনুৰাগীৰ সহায় অবিহনে মোৰ এই সুন্দৰ যাত্ৰা সম্পূৰ্ণ নহ’লহেঁতেন। খেলৰ সময়ত কেইবাবাৰো গুৰুতৰ আঘাতত ভুগিছিলো। এই সময়ছোৱাত ৰাষ্ট্ৰীয় ক্ৰিকেট একাডেমী (এন চি এ)ৰ ফিজিঅ’, প্ৰশিক্ষকৰ অক্লান্ত প্ৰচেষ্টাৰ বাবে প্ৰতিবাৰেই মই পুনৰ খেলপথাৰলৈ উভতি আহিবলৈ সক্ষম হৈছিলো।’
উল্লেখ্য যে, দেশৰ হৈ অত্যন্ত বেগত বলিং কৰা বলাৰৰ তালিকাত নাম আহে বৰুণ এৰনৰ। তেওঁ ঘণ্টাত ১৫২.৫ কিলোমিটাৰ গতিবেগেৰে বলিং কৰি ক্ৰিকেট অনুৰাগীক স্তম্ভিত কৰি তুলিছিল। অৱশ্যে দেশৰ হৈ আন্তঃৰাষ্ট্ৰীয় ক্ৰিকেটত সৰ্বাধিক গতিবেগত বলিং কৰাৰ অভিলেখ প্ৰাক্তন ক্ৰিকেটাৰ জভাগল শ্ৰীনাথৰ নামত আছে। শ্ৰীনাথে প্ৰতি ঘণ্টাত ১৫৪.৫ কিলোমিটাৰ গতিবেগেৰে বলিং কৰিছিল।
আন্তঃৰাষ্ট্ৰীয় ক্ৰিকেটত ভাৰতৰ সৰ্বাধিক বেগী বলাৰ
১৫৪.৫ কিলোমিটাৰ প্ৰতি ঘণ্টাত – জভাগল শ্ৰীনাথ
১৫৩.৭ কিলোমিটাৰ প্ৰতি ঘণ্টাত – ইৰফান পাঠান
১৫৩.৩ কিলোমিটাৰ প্ৰতি ঘণ্টাত – মহম্মদ ছামী
১৫৩.২৬ কিলোমিটাৰ প্ৰতি ঘণ্টাত – জশপ্ৰীত বুমৰাহ
১৫২.৮ কিলোমিটাৰ প্ৰতি ঘণ্টাত – নৱদীপ ছাইনী
১৫২.৬ কিলোমিটাৰ প্ৰতি ঘণ্টাত – ঈশান্ত শৰ্মা
১৫২.৫ কিলোমিটাৰ প্ৰতি ঘণ্টাত – বৰুণ এৰন
বৰুণ এৰনৰ আন্তঃৰাষ্ট্ৰীয় ক্ৰিকেট কেৰিয়াৰ
যদি আমি বৰুণ এৰনৰ আন্তঃৰাষ্ট্ৰীয় ক্ৰিকেট কেৰিয়াৰৰ কথা কওঁ, তেন্তে তেওঁৰ কেৰিয়াৰ বৰ বেছি দীঘলীয়া নাছিল। তেওঁ দেশৰ হৈ ৯ খন টেষ্ট আৰু ৯ খন এদিনীয়া মেচ খেলিবলৈ সক্ষম হয়। এই সময়ছোৱাত তেওঁ ১৪টা টেষ্ট ইনিংছত ৫২.৬১ গড়ে ১৮টা উইকেট আৰু ৯টা এদিনীয়া ইনিংছত ৩৮.০৯ গড়ে ১১টা উইকেট দখল কৰে।
বৰুণ এৰনৰ আই পি এল কেৰিয়াৰ
দেশৰ হৈ বহু আন্তঃৰাষ্ট্ৰীয় মেচ খেলা নাছিল যদিও মুঠ ৫২ খন আই পি এল মেচত অংশ লৈছিল বৰুণ এৰনে। এই সময়ছোৱাত তেওঁ ৩৩.৬৬ গড়ে ৫০ ইনিংছত ৪৪টা উইকেট দখল কৰিবলৈ সক্ষম হয়। আই পি এলত তেওঁৰ শ্ৰেষ্ঠ বলিং প্ৰদৰ্শন ১৬ ৰানত তিনিটা উইকেট।
