পশ্চিম বংগৰ মুছলমান অধ্যুষিত মুৰ্ছিদাবাদ জিলাত ৮ এপ্ৰিলত ৱাকফ (সংশোধনী) আইনৰ বিৰুদ্ধে প্ৰতিবাদ সাব্যস্ত কৰাৰ সময়ত আৰক্ষীলৈ শিলগুটি নিক্ষেপ কৰাৰ লগতে তেওঁলোকৰ বাহনত জুই লগাই দিয়াৰ অভিযোগ উত্থাপন হৈছে।
এই কাণ্ড সংঘটিত হৈছে জাংগীপুৰ অঞ্চলত য’ত বিয়লিৰ ভাগত এই আইন প্ৰত্যাহাৰৰ দাবীত বৃহৎ সংখ্যক লোক সমবেত হৈছিল।
জিলাখনৰ এগৰাকী জ্যেষ্ঠ আৰক্ষী বিষয়াই জনোৱা মতে, প্ৰতিবাদকাৰীসকলে অঞ্চলটোত নিয়োজিত আৰক্ষীক শিলগুটি নিক্ষেপ কৰাৰ লগতে একাংশ আৰক্ষীৰ বাহনত অগ্নিসংযোগো কৰে। এই কাণ্ডৰ পিছতে অঞ্চলটোত নিৰাপত্তা অধিক শক্তিশালী কৰা হৈছে।
উল্লেখযোগ্য যে ৩ এপ্ৰিলৰ নিশা লোকসভাত আৰু ৪ এপ্ৰিলৰ মাজনিশাৰ পিছত ৰাজ্যসভাই ৱাকফ (সংশোধনী) বিধেয়কখন গৃহীত কৰে।ইয়াৰ পিছত ৫ এপ্ৰিলত ৰাষ্ট্ৰপতি দ্ৰৌপদী মুৰ্মুৱে এই বিধেয়কখনত অনুমোদন জনায় আৰু ইয়াৰ পিছৰে পৰা সমগ্ৰ দেশতে এই বিধেয়ক বলবৎ হৈছে। চৰকাৰে অধিসূচনা জাৰি কৰি এই তথ্য দিয়ে।
একে সময়তে বিজেপি নেতৃত্বাধীন এন ডি এ মিত্ৰজোঁটে এই বিধেয়কখন সমৰ্থন কৰাৰ বিপৰীতে বিৰোধী দলৰ ‘ভাৰত’ মিত্ৰজোঁটে ইয়াৰ বিৰোধিতা কৰিছিল। এই আইনৰ বিৰুদ্ধে বহু মুছলমান সংগঠন আৰু বিৰোধী সাংসদে উচ্চতম ন্যায়ালয়ৰ কাষ চাপিছে।
চৰকাৰে কয় যে এই আইনখন স্বচ্ছতা বৃদ্ধি, পিছপৰা মুছলমান আৰু মহিলা সবলীকৰণৰ বাবে অনা হৈছে। একে সময়তে বিৰোধীয়ে কয় যে, এই আইনখন সংবিধানৰ বিৰুদ্ধে আৰু ই মুছলমানৰ অধিকাৰ খৰ্ব কৰিছে।
