আই পি এলৰ ১৮ সংখ্যক ছিজনৰ ষষ্ঠ মেচখনত কলকাতা নাইট ৰাইডাৰ্ছে ৮ উইকেটত পৰাস্ত কৰিছে ৰাজস্থান ৰয়েলছক। মেচখনত পৰাস্ত হ’লেও দলটোৰ অপেনাৰ বেটছমেন যশশ্বী জয়ছৱালৰ নামত সংযোজন হৈছে এক বিশেষ অভিলেখ।
গুৱাহাটীত কলকাতা নাইট ৰাইডাৰ্ছৰ বিৰুদ্ধে খেলা মেচখনত জয়ছৱালে ২৯ ৰানৰ ইনিংছ খেলাৰ পিছতে টি-২০ ক্ৰিকেটত তেওঁৰ সম্পূৰ্ণ হয় ৩০০০ ৰান। এই মাইলষ্ট’নত উপনীত হোৱাৰ লগে লগে তেওঁ টি-২০ ক্ৰিকেটত ভাৰতৰ হৈ সৰ্বাধিুক দ্ৰুত গতিত ৩০০০ ৰান সম্পূৰ্ণ কৰা চতুৰ্থগৰাকী বেটছমেনৰূপে পৰিগণিত হয়।
কেৱল এয়াই নহয় এই ক্ষেত্ৰত তেওঁ অতিক্ৰম কৰে শুভমন গীলৰ নামত থকা অভিলেখ। গীলক টি-২০ কেৰিয়াৰত ৩০০০ ৰান সম্পূৰ্ণ কৰাৰ বাবে প্ৰয়োজন হৈছিল ১০৩টা ইনিংছৰ। ইফালে জয়ছৱালে ১০২টা ইনিংছত সম্পূৰ্ণ কৰে ৩০০০ ৰান।
ভাৰতৰ হৈ সৰ্বাধিক দ্ৰুত গতিত ৩০০০ ৰান সম্পূৰ্ণ কৰা বেটছমেনগৰাকী হৈছে তিলক বৰ্মা। মাত্ৰ ৯০টা ইনিংছতেই তেওঁ এই বিশেষ মাইলষ্ট’নত উপনীত হৈছিল। ৯১টা ইনিংছেৰে এই তালিকাৰ দ্বিতীয় স্থানত আছে ৰুতুৰাজ গায়কোৱাড। এই তালিকাৰ তৃতীয় স্থানত আছে কে এল ৰাহুল। ৰাহুলে ৯৩টা ইনিংছত সম্পূৰ্ণ কৰিছিল ৩০০০ ৰান।
টি-২০ত সৰ্বাধিক দ্ৰুত গতিত ৩০০০ ৰান সম্পূৰ্ণ কৰা ভাৰতীয় বেটাৰ
৯০ ইনিংছ- তিলক বাৰ্মা
৯১ ইনিংছ- ৰুতুৰাজ গায়কোৱাড
৯৩ ইনিংছ- কে এল ৰাহুল
১০২ ইনিংছ- যশস্বী জয়ছৱাল
১০৩ ইনিংছ- শুভমন গীল
ইফালে সামগ্ৰিকভাৱে সৰ্বাধিক দ্ৰুত গতিত ৩০০০ ৰান সম্পূৰ্ণ কৰাৰ ক্ৰিকেটাৰৰ তালিকাত শীৰ্ষ স্থানত আছে অষ্ট্ৰেলিয়াৰ শ্বন মাৰ্শ্ব। মাৰ্শ্বে ৮৫টা ইনিংছতেই ৩০০০ ৰান সম্পূৰ্ণ কৰিছিল।
