মসৃণ আৰু উজ্জ্বল ছালৰ অধিকাৰী হ’বলৈ বাৰু কোনে নিবিচাৰে। পুৰুষেই হওঁক বা মহিলাই হওঁক সকলোৱে এখন উজ্জ্বল আৰু স্বাস্থ্যবান ছাল বিচাৰে।
ৰুক্ষ আৰু নিস্তেজ ছালৰ সমস্যাৰ বাবে বহুতো লোক পৰে অসুবিধাত। বহুতে নিজৰ ছালখন উজ্জ্বল কৰি ৰাখিবলৈ বহুতো সৌন্দৰ্যবৰ্ধক সামগ্ৰী ব্যৱহাৰ কৰে। কিন্তু বহুক্ষেত্ৰত এনেধৰণৰ সামগ্ৰীয়ে ছালৰ ক্ষতিসাধনহে কৰে।
ইয়াৰ উপৰি বতৰৰ পৰিবৰ্তন আৰু ভুল জীৱনশৈলী যেনে অস্বাস্থ্যকৰ খাদ্য খোৱা, নিশা পলমকৈ শোৱা, অত্যধিক চাপ লোৱা আদিয়ে আমাৰ ছালক প্ৰভাৱিত কৰে। বতৰৰ পৰিবৰ্তন আৰু অপুষ্টিকৰ আহাৰৰ বাবে পোৰা আৰু দাগৰ দৰে সমস্যা হয়। যাৰ বাবে ছালৰ সঠিক যত্ন লোৱাটো অতিকৈ দৰকাৰী। এনে পৰিস্থিতিত জীৱনশৈলী আৰু খাদ্য তালিকাত কিছু পৰিবৰ্তনৰ প্ৰয়োজন।
আহাৰে আমাৰ স্বাস্থ্য আৰু সৌন্দৰ্যৰ ওপৰত যথেষ্ট প্ৰভাৱ পেলায়। কিয়নো এনে কিছুমান ফল আৰু পাচলি আছে, যি আমাৰ স্বাস্থ্যৰ লগতে ছালৰ বাবেও যথেষ্ট উপকাৰী।
ডায়েটিচিয়ান ৰিচা গংগানীয়ে তেওঁৰ সামাজিক মাধ্যমত এটা ভিডিঅ’ শ্বেয়াৰ কৰিছে য’ত তেওঁ উজ্জ্বল ছাল পাবলৈ এবিধ পানীয়ৰ কথা কৈছে। তেওঁ কৈছে যে ৫বিধ স্বাস্থ্যকৰ উপাদানেৰে তৈয়াৰ এইবিধ পানীয় এণ্টি ইনফ্লেমেট’ৰি, য’ত ভিটামিন A, ভিটামিন C আৰু ভিটামিন K থাকে, যিয়ে কলাজেন গঠন কৰাত সহায় কৰে। ই নতুন কোষৰ বৃদ্ধিৰ লগতে এক স্বাস্থ্যৱান ছাল গঠনত সহায়ক হয়।
তেওঁ কৈছে যে একেৰাহে ২১ দিনৰ বাবে এইবিধ পানীয় সেৱন কৰিলে ছালৰ উজ্জ্বলতা যথেষ্টখিনি বৃদ্ধি হয়। এই পানীয় তৈয়াৰ কৰিবলৈ প্ৰথমে আপেল এটুকুৰা ল’ব লাগিব। তাৰ পাছত এটা তিয়ঁহ, এটা গাজৰ আৰু এটা বীটৰ প্ৰত্যকৰে এটা এটা অংশ লৈ লগত ডালিমৰ গুটি কেইটামান লৈ তাৰ ৰস উলিয়াই অলপ মৌ মিহলাই ইয়াক গ্ৰহণ কৰিব লাগে।
কিন্তু কোনো ব্যক্তিৰ যদি এনে পানীয় তৈয়াৰ কৰিবলৈ ব্যৱহৃত যিকোনো খাদ্যৰ প্ৰতি যদি এলাৰ্জি থাকে, তেনেহ’লে তেওঁলোকে ইয়াৰ গ্ৰহণ কৰাৰ পৰা বিৰত থাকিব লাগে। লগতে যদিহে কোনো ব্যক্তিৰ মধুমেহ বা কোনোধৰণৰ সমস্যা আছে, তেন্তে ইয়াক সেৱন কৰাৰ আগতে নিজৰ বিশেষজ্ঞৰ লগত আলোচনা কৰা উচিত।
