শনিবাৰে নতুন দিল্লীত কেন্দ্ৰীয় গৃহমন্ত্ৰী অমিত শ্বাহে মণিপুৰৰ পৰিস্থিতি সন্দৰ্ভত এক পৰ্যালোচনা বৈঠক অনুষ্ঠিত কৰে। মণিপুৰৰ ৰাজ্যপাল অজয় কুমাৰ ভল্লা, ৰাজ্যৰ শীৰ্ষ বিষয়াৰ লগতে সেনা আৰু অৰ্ধসামৰিক বাহিনীৰ বিষয়াসকলো উপস্থিত থাকে।
এই বৈঠকত মণিপুৰৰ আভ্যন্তৰীণ পৰিস্থিতি স্বাভাৱিক কৰাৰ লগতে অবৈধ অস্ত্ৰ আত্মসমৰ্পণৰ ওপৰত গুৰুত্ব আৰোপ কৰা হয়।
ৰাজ্যত ৰাষ্ট্ৰপতিৰ শাসন প্ৰযোজ্য কৰাৰ পিছত এইখনেই আছিল প্ৰথম পৰ্যালোচনা বৈঠক। অমিত শ্বাহে নিৰ্দেশ জাৰি কৰিছে যে মণিপুৰৰ সকলো বন্ধ পথ ৮ মাৰ্চৰ পৰা মুকলি কৰিব লাগে। যদি কোনো ধৰণৰ হস্তক্ষেপ হয় তেন্তে ইয়াৰ বিৰুদ্ধে কঠোৰ ব্যৱস্থা গ্ৰহণ কৰিব লাগে।
উল্লেখ্য যে, প্ৰায় দুবছৰ ধৰি মণিপুৰত ব্যাপক হিংসাত্মক পৰিস্থিতিৰ সৃষ্টি হৈছে, যাৰ ফলত ২০০ৰো অধিক লোকৰ মৃত্যু হৈছে।
‘ড্ৰাগছ নেটৱৰ্কৰ বিৰুদ্ধেও কঠোৰ ব্যৱস্থা গ্ৰহণ কৰক’
গৃহ মন্ত্ৰালয়ৰ এক বিবৃতিত কোৱা হৈছে যে মণিপুৰক ড্ৰাগছমুক্ত কৰিবলৈ হ’লে ড্ৰাগছৰ ব্যৱসায়ৰ সৈতে জড়িত সমগ্ৰ নেটৱৰ্কটো ধ্বংস কৰিব লাগিব।
এটা সূত্ৰৰ উদ্ধৃতি দি ৰাষ্ট্ৰীয় সংবাদ মাধ্যমে প্ৰকাশ কৰা অনুসৰি, ‘মণিপুৰৰ নিৰাপত্তা পৰিস্থিতিৰ বুজ ল’লে গৃহমন্ত্ৰীয়ে। ৰাজ্যৰ সামগ্ৰিক আইন-শৃংখলা পৰিস্থিতিৰ সন্দৰ্ভত বিতং তথ্য দিয়া হয়।’
বীৰেণ সিঙে মুখ্যমন্ত্ৰীৰ পদৰ পৰা পদত্যাগ কৰাৰ কিছুদিন পিছতে উত্তৰ-পূবৰ ৰাজ্যখনত ৰাজনৈতিক অনিশ্চয়তাৰ সৃষ্টি হৈছিল। ইয়াৰ পিছত কেন্দ্ৰই ১৩ ফেব্ৰুৱাৰীত মণিপুৰত ৰাষ্ট্ৰপতিৰ শাসন প্ৰযোজ্য কৰিছিল।
