বিহাৰৰ নীতিশ কুমাৰ নেতৃত্বাধীন চৰকাৰে লৈছে এক ডাঙৰ সিদ্ধান্ত। এতিয়াৰে পৰা ৰাজ্যখনৰ চৰকাৰী বিভাগসমূহত হিন্দী আৰু ইংৰাজীৰ লগতে উৰ্দু ভাষাতো হ’ব কাম-কাজ। সূচাৰুৰূপে কাম-কাজবোৰ যাতে কৰিব পৰা যায় তাৰ বাবে চৰকাৰে এতিয়া বিভাগসমূহৰ কৰ্মচাৰী আৰু বিষয়াসকলক উৰ্দুৰ প্ৰশিক্ষণ প্ৰদান কৰিব। ৮ এপ্ৰিলৰ পৰা আৰম্ভ হ’ব উৰ্দু শিকাৰ প্ৰশিক্ষণ।
বিভাগসমূহৰ সৈতে জড়িত লোকসকলে শিকিব লাগিব উৰ্দু
চৰকাৰে সিদ্ধান্ত লৈছে যে বিষয়াকে ধৰি বিভিন্ন বিভাগৰ সৈতে জড়িত লোকসকলে উৰ্দু শিকিব লাগিব। নীতিশ চৰকাৰৰ কেবিনেট সচিবালয়ে চৰকাৰী কৰ্মচাৰী আৰু বিষয়াসকলৰ লগতে সাহিত্য, পোষকতা, শিক্ষা, সমাজসেৱা আৰু সাংবাদিকতাৰ সৈতে জড়িত লোকসকলক উৰ্দু শিকিবলৈ আহ্বান জনাইছে। অহা ৮ এপ্ৰিলৰ পৰা আৰম্ভ হ’ব এই প্ৰশিক্ষণ। ৭০ দিনৰ বাবে দৈনিক দুঘণ্টাকৈ উৰ্দু ভাষাৰ পাঠদান কৰা হ’ব।
কেবিনেট সচিবালয় বিভাগৰ উৰ্দু সঞ্চালকালয়ে জনাইছে যে কেন্দ্ৰীয় বা ৰাজ্যিক কাৰ্যালয়ত কৰ্মৰত কৰ্মচাৰী আৰু বিষয়াসকলে যিসকলে উৰ্দু নাজানে আৰু এই ভাষা শিকিব বিচাৰে, তেওঁলোক সাজু হ’ব লাগে। উৰ্দু ভাষাৰ জ্ঞানৰ বাবে তেওঁলোকক প্ৰশিক্ষণ দিয়া হ’ব।
উৰ্দু প্ৰশিক্ষণৰ বাবে ৮ এপ্ৰিলৰ পৰা আৰম্ভ হৈছে প্ৰশিক্ষণ। চৰকাৰৰ এই পদক্ষেপে কেৱল উৰ্দু ভাষা জনা সাধাৰণ লোকসকলক তেওঁলোকৰ চৰকাৰী কাম সহজে সম্পন্ন কৰাত সহায় কৰিব।
এই প্ৰশিক্ষণ বন্ধৰ দিন বাদ দি প্ৰতি সোমবাৰ, মঙলবাৰ, বুধবাৰ আৰু বৃহস্পতিবাৰে দুপৰীয়া ১ বজাৰ পৰা বিয়লি ৩ বজালৈ দিয়া হ’ব। উৰ্দু ভাষাত প্ৰশিক্ষণ ল’ব বিচৰা চৰকাৰী কৰ্মচাৰীসকলে অনলাইন আবেদন কৰাৰ উপৰি উৰ্দু সঞ্চালকালয় হিন্দী ভৱনৰ ঠিকনালৈও আবেদন প্ৰেৰণ কৰিব পাৰে।
বেচৰকাৰী লোকে পোনপটীয়াকৈ মেইল বা ডাক ঠিকনাৰ জৰিয়তে আবেদন প্ৰেৰণ কৰিব পাৰিব। উল্লেখ্য যে উৰ্দু হৈছে ৰাজ্যখনৰ দ্বিতীয় চৰকাৰী ভাষা।
