তামিলনাডুত সংঘটিত হৈছে এক ভয়ংকৰ ঘটনা। ৰাজ্যখনৰ বহুজন সমাজ পাৰ্টী (বি এছ পি)ৰ প্ৰধান কে আৰ্মষ্ট্ৰঙক দিন দুপৰতে দুৰ্বৃত্তৰ এটা দলে নৃশংসভাৱে হত্যা কৰিছে। বন্ধুৰ সৈতে আলোচনা কৰি থকা সময়তে ৬ জনীয়া নৰপিশাচৰ এটা দলে আৰ্মষ্ট্ৰঙক আক্ৰমণ কৰে।
আৰক্ষীয়ে জানিব দিয়া অনুসৰি, আক্ৰমণৰ পিছত আৰ্মষ্ট্ৰঙক হাস্পতাললৈ লৈ যোৱা হৈছিল যদিও চিকিৎসকে তেওঁক মৃত বুলি ঘোষণা কৰে।
আৰক্ষীয়ে ঘটনাৰ তদন্ত আৰম্ভ কৰিছে যদিও প্ৰতিশোধৰ মানসিকতাৰে এই হত্যাকাণ্ড সংঘটিত হোৱা বুলি অনুমান কৰিছে।
জানিব পৰা অনুসৰি শুকুৰবাৰে মটৰ চাইকেলেৰে অহা ছয়জন লোকে কুঠাৰেৰে আক্ৰমণ কৰে বিএছপি তামিলনাডুৰ মুৰব্বী আৰ্মষ্ট্ৰঙক। চেন্নাইৰ চেম্বিয়ামস্থিত নিজ ঘৰৰ সমীপত দলীয় বিষয়াৰ সৈতে কথা পাতি থকা অৱস্থাত আক্ৰমণকাৰীয়ে তেওঁক লক্ষ্য কৰি লয়।
ঘটনাৰ পিছত পৰিয়ালৰ লোকে তেওঁক চিকিৎসালয়লৈ লৈ যায় যদিও তেওঁক মৃত ঘোষণা কৰে।
আৰ্মষ্ট্ৰংৰ হত্যাকাণ্ডক লৈ শোক প্ৰকাশ কৰি বি এছ পিৰ মুৰব্বী মায়াৱতীয়ে এক্সযোগে এটা পোষ্টত কয় যে আজি সন্ধিয়া বিএছপি তামিলনাডু ৰাজ্যিক ইউনিটৰ সভাপতি কে আৰ্মষ্ট্ৰঙৰ চেন্নাইৰ বাসগৃহৰ বাহিৰত হোৱা নৃশংস হত্যাকাণ্ড অত্যন্ত দুখজনক আৰু অতি নিন্দনীয়।
পেছাত এগৰাকী অধিবক্তা আৰ্মষ্ট্ৰঙৰ হত্যা কাণ্ডৰ দোষীক অতি শীঘ্ৰে শাস্তি প্ৰদান কৰিবলৈও ৰাজ্য চৰকাৰক দাবী জনায়।
উল্লেখ্য যে, আৰ্মষ্ট্ৰঙৰ হত্যাকাৰীক উচিত শাস্তি প্ৰদানৰ দাবীত বৰ্তমান তামিলনাডুত বি এছ পিৰ নেতা-কৰ্মীসকলে তীব্ৰ প্ৰতিবাদ সাব্যস্ত কৰিছে।
