বাংলাদেশত পুনৰ এবাৰ লক্ষ্য কৰি লোৱা হ’ল প্ৰাক্তন প্ৰধানমন্ত্ৰী শ্বেখ হাছিনাৰ দল আৱামী লীগক। বাংলাদেশ জাতীয়তাবাদী পাৰ্টিৰ ছাত্ৰ শাখাৰ বেনাৰত থকা বুলি অভিযোগ উত্থাপন কৰি প্ৰাক্তন মেয়ৰ আনোৱাৰুজ্জামান চৌধুৰী আৰু প্ৰাক্তন সাংসদ ছফিউল আলম চৌধুৰী নাডেলৰ গৃহত আক্ৰমণ সংঘটিত হয় আৰু ভাঙি-ছিঙি সকলো সা-সম্পত্তি লণ্ডভণ্ড কৰে।
স্থানীয় সংবাদ মাধ্যমে প্ৰকাশ কৰা অনুসৰি, চিলেট বিমানবন্দৰ আৰক্ষী থানাৰ ভাৰপ্ৰাপ্ত বিষয়া চৈয়দ অনিছুৰ ৰহমানে জনোৱা মতে, ছাত্ৰ-ছাত্ৰী আৰু সাধাৰণ নাগৰিকৰ এক হিংস্ৰ দলে প্ৰাক্তন সাংসদ নাডেলৰ বাসগৃহত আক্ৰমণ কৰি বিস্তৰ ক্ষতিসাধন কৰে।
স্থানীয় প্ৰত্যক্ষদৰ্শীয়ে জনোৱা মতে, বুধবাৰে বাইকত উঠি ৭০-৮০ জনীয়া ছাত্ৰ উইং সদস্যৰ এটা দলে শোভাযাত্ৰা কৰি চিলেট চহৰৰ হাউছিং এষ্টেট অঞ্চলৰ নাডেলৰ বাসগৃহত উপস্থিত হয়। ঘৰত প্ৰৱেশ কৰি চিচিটিভি কেমেৰা আৰু লেপটপ নষ্ট কৰে।
আন এক ঘটনা সংঘটিত হৈছে চিলেটৰ পাঠানতুলা অঞ্চলত আনোৱাৰুজ্জামান চৌধুৰীৰ ঘৰত আক্ৰমণ। আচবাব আৰু অন্যান্য ঘৰুৱা সামগ্ৰী ভাঙি শেষ কৰি পেলাইছে আক্ৰমণকাৰীয়ে।
জালালাবাদ থানাৰ ভাৰপ্ৰাপ্ত বিষয়া হাৰুনুৰ ৰছিদে কয় যে, এই ঘচনাৰ ৰিপৰ্ট পোৱাৰ পিছতে আৰক্ষীয়ে উচিত ব্যৱস্থা গ্ৰহণ কৰে।
স্থানীয় সংবাদ মাধ্যমৰ মতে, তেওঁলোকৰ ঘৰৰ পৰা মূল্যবান সামগ্রীও চুৰি কৰি লৈ যায় ৰাইজে৷ ঘটনাৰ সময়ত আনোৱাৰুজ্জামানৰ গৃহত কোনো আত্মীয় উপস্থিত নাছিল। দুজন কেয়াৰটেকাৰে তেওঁলোকৰ ঘৰটো চোৱাচিতা কৰিছিল। ইফালে আক্ৰমণকাৰীয়ে তেওঁলোকক নিৰ্যাতন চলোৱাৰো অভিযোগ উত্থাপন হৈছে।
বিগত বৰ্ষত শ্বেখ হাছিনা চৰকাৰৰ পতনৰ পিছৰে পৰা বাংলাদেশত অব্যাহত আছে ৰাজনৈতিক হিংসা। একে সময়তে মহম্মদ ইউনুছৰ নেতৃত্বত অন্তৱৰ্তীকালীন চৰকাৰখনে এই হিংসাত্মক ঘটনা ৰোধ কৰাত ব্যৰ্থ হৈছে।
বাংলাদেশৰ আগশাৰীৰ দৈনিক কাকত ‘দ্য ঢাকা ট্ৰিবিউন’ত প্ৰকাশিত এক প্ৰতিবেদন অনুসৰি, ২০২৪ চনৰ আগষ্ট মাহত সমগ্ৰ বাংলাদেশতে কমেও ২০ জন আৱামি লীগৰ নেতা আৰু তেওঁলোকৰ পৰিয়ালৰ সদস্যৰ প্ৰাণহানি হৈছিল।
