ভাৰতীয় ক্ৰিকেট দলৰ মুখ্য প্ৰশিক্ষক পদত অধিষ্ঠিত হ’ল গৌতম গম্ভীৰ। মঙলবাৰে বিচিচিআইৰ সচিব জয় শ্বাহে এই কথা আনুষ্ঠানিকভাৱে ঘোষণা কৰে। গৌতম গম্ভীৰৰ নাম নিশ্চিত হোৱাৰ লগে লগে প্ৰশিক্ষক ষ্টাফত আন কেইবাগৰাকীও প্ৰাক্তন ক্ৰিকেটাৰে স্থান পাব বুলি চৰ্চা চলিছে।
২০১১ চনত এদিনীয়া বিশ্বকাপ জয়ী কৰোৱাত অন্যতম মুখ্য ভূমিকা গ্ৰহণ কৰা ভাৰতীয় দলৰ বেগী বলাৰ জাহিৰ খানে বলিং প্ৰশিক্ষকৰ দায়িত্ব লাভ কৰাৰ সম্ভাৱনা আছে।
এ এন আইৰ প্ৰতিবেদন অনুসৰি, টীম ইণ্ডিয়াৰ বলিং প্ৰশিক্ষকৰ দৌৰত আছে জাহিৰ খান। কেৱল জাহিৰ খানেই নহয় বলিং প্ৰশিক্ষক পদৰ বাবে লক্ষ্মীপতি বালাজীৰ নামো চৰ্চাত আছে।
উল্লেখ্য যে, যদিহে বলিং প্ৰশিক্ষক পদত জাহিৰ খান অধিষ্ঠিত হয় তেন্তে ৰোহিত বাহিনী যথেষ্ট উপকৃত হ’ব। কিয়নো দীঘলীয়া আন্তঃৰাষ্ট্ৰীয় কেৰিয়াৰৰ অনুভৱ আছে জাহিৰ খানৰ। তেওঁ বিশ্বৰ প্ৰতিটো প্ৰান্ততে খেলাৰ অনুভৱ আছে।
জাহিৰ খানে ভাৰতৰ হৈ ২০০ খন এদিনীয়াত ২৮২টা উইকেট দখল কৰিছিল। ইয়াৰ উপৰি ৯২খন টেষ্ট মেচত লাভ কৰিছিল ৩১১টা উইকেট। আই পি এলৰ ১০০ খন মেচত দখল কৰিছিল ১০২টা উইকেট।
উল্লেখ্য যে, ভাৰতে আগন্তুক দুবছৰত মুঠ ৫ খন আই চি চি টুৰ্ণামেণ্টছত অংশ ল’ব। ইয়াৰ ভিতৰত আছে চেম্পিয়নছ ট্ৰফী, এদিনীয়া বিশ্বকাপ, টি-২০ বিশ্বকাপ আৰু দুটা টেষ্ট চেম্পিয়নশ্বিপ ট্ৰফী।
জাহিৰ খান টীম ইণ্ডিয়াৰ বলিং প্ৰশিক্ষক হয় নে নহয় সেয়া এতিয়াও স্পষ্ট হোৱা নাই যদিও অভিষেক নায়াৰ বেটিং প্ৰশিক্ষক পদত অধিষ্ঠিত হোৱাটো প্ৰায় খাটাং হৈ পৰিছে। তেওঁ আই পি এলৰ কলকাতা নাইট ৰাইডাৰ্ছ দলৰ সহকাৰী প্ৰশিক্ষকৰূপেও কাৰ্যনিৰ্বাহ কৰিছিল।
