ৰঙিয়াৰ তুলসীবাৰীত আৱতৰীয়া দিপাৱলী। জম্মু-কাশ্মীৰৰ পেহেলগামত ইছলামিক সন্ত্ৰাসবাদীয়ে হিন্দু নাগৰিকৰ ওপৰত কৰাৰ বৰ্বৰ আক্ৰমণৰ প্ৰতিশোধ স্বৰূপে ভাৰতৰ সেনাবাহিনীয়ে গ্ৰহণ কৰা অপাৰেশ্যন সেন্দূৰৰ সফলতাত উৎফুল্লিত হৈ পৰিছে ৰঙিয়াৰ বিভিন্ন দল-সংগঠন।
ৰাষ্ট্ৰীয় বজৰংগ দল, আন্তঃৰাষ্ট্ৰীয় হিন্দু পৰিষদে ভাৰতীয় সেনাৰ সাহসিকতাত প্ৰশংসা কৰাৰ লগতে অপাৰেশ্যনৰ সফলতাকৈ লৈ আনন্দ প্ৰকাশ কৰে। বুধবাৰে নিশা ৰঙিয়াৰ তুলসীবাৰীত এই সংগঠন দুটাই উদযাপন কৰে বিজয় উৎসৱ।
ভাৰত -ভূটান আন্তঃৰাষ্ট্ৰীয় ঘাইপথত সংগঠনটোৰ নেতৃবৃন্দৰ লগতে কৰ্মীসকল সমবেত হৈ ফটকা ফুটাই হৰ্ষোল্লাস কৰে। ভাৰত মাতা কি জয়, বন্দে মাতৰম, জয় শ্ৰী ৰাম আদি ধ্বনিৰে পৰিৱেশ মুখৰিত কৰি তোলে সংগঠন দুটাৰ সদস্যসকলে। কেন্দ্ৰীয় চৰকাৰে গ্ৰহণ কৰা উদ্যোগৰো শলাগ লয়।
ইফালে সংগঠন দুটাৰ সাংগঠনিক যোজনা অনুসৰি ভাৰত সীমান্তৰ গাঁও আৰু নিকটৱৰ্তী চহৰৰ পৰা লোকসকলক নিৰাপদ স্থানলৈ স্থানান্তৰিত কৰি নিবাস আৰু ভোজনৰ ব্যৱস্থা গ্ৰহণ কৰা বুলিও সংবাদ মাধ্যমৰ আগত সদৰি কৰে।
আনহাতে সেনা জোৱান আৰু আহত নাগৰিকৰ বাবে এক লাখ ইউনিট ৰক্ত দানৰো উদ্যোগ লোৱা বুলি জানিবলৈ দি ৰঙিয়া জিলা সমিতিৰ তত্বাৱধানত এহেজাৰ ইউনিট ৰক্তদানৰ পদক্ষেপ গ্ৰহণ কৰাৰ কথাও প্ৰকাশ কৰে।
