সন্ত্ৰাসজৰ্জৰ জম্মু-কাশ্মীৰৰ কিস্তৱাড়া অঞ্চলত সন্ত্ৰাসবাদীৰে হোৱা সংঘৰ্ষত এজন জোৱান শ্বহীদ হৈছে। এতিয়াও অঞ্চলটোত নিৰাপত্তাৰক্ষী আৰু সন্ত্ৰাসবাদীৰ মাজত তীব্ৰ সংঘৰ্ষ চলি থকা বুলি জানিব পৰা গৈছে।
ভাৰতীয় সেনাৰ এগৰাকী শীৰ্ষ বিষয়াই জানিব দিয়া অনুসৰি সন্ত্ৰাসবাদীৰ সৈতে এতিয়াও ভয়ংকৰ সংঘৰ্ষ চলি আছে। এই সংঘৰ্ষত এজন জোৱান আহত হৈছিল আৰু চিকিসাৰ সময়ত তেওঁৰ মৃত্যু হয়।
শীৰ্ষ বিষয়াই জনোৱা অনুসৰি চতৰুৰৰ শিংপুৰা অঞ্চলত সন্ত্ৰাসবাদীৰ উপস্থিতিৰ তথ্য লাভ কৰাৰ পিছতে নিৰাপত্তাৰক্ষীয়ে অভিযান আৰম্ভ কৰে। ইয়াৰ পিছতে নিৰাপত্তাৰক্ষীৰ সৈতে সন্ত্ৰাসবাদীৰ মাজত আৰম্ভ হয় সংঘৰ্ষ।
শীৰ্ষ আৰক্ষী বিষয়াই এক্সযোগে এটা প’ষ্টত কয়, ‘আজি পুৱা কিস্তৱাড়াৰ চতৰু অঞ্চলত আৰক্ষী আু সেনাৰ যৌথ অভিযানৰ সময়ত সন্ত্ৰাসবাদীৰ সৈতে সংঘৰ্ষ হয়।’ তেওঁ লগতে অঞ্চলটোত অতিৰিক্ত সেনা বাহিনী নিয়োগ কৰা বুলিও জানিব দিয়ে।
উল্লেখ্য যে, প্ৰাপ্ত খবৰ অনুসৰি অঞ্চলটোত তিনিৰ পৰা চাৰিজন উগ্ৰপন্থীয়ে বাহৰ পাতি আছে। নিৰাপত্তাৰক্ষীয়ে এই অপাৰেশ্যনক ‘ত্ৰাশি’ নাম দিছে।
