ভিটামিন ই এবিধ শক্তিশালী এন্টিঅক্সিডেন্ট যিয়ে শৰীৰৰ কোষ শক্তিশালী কৰে। ই ছাল, চকু আৰু ৰোগ প্ৰতিৰোধ ক্ষমতাৰ বাবে উপকাৰী। ইয়াৰ উপৰিও শৰীৰৰ পেশী আৰু স্নায়ুতন্ত্ৰৰ কাম-কাজত সহায় কৰে।
ভিটামিন ই বহু খাদ্যত প্ৰাকৃতিকভাৱে পোৱা যায়। ইয়াৰ ভিতৰত আছে সূৰ্যমুখীৰ গুটি, আলমণ্ড, কচু আৰু উদ্ভিদ তেল। ই সুষম পৰিমাণে শৰীৰক সুস্থ কৰি ৰখাত সহায় কৰে, কিন্তু যেতিয়া শৰীৰে ইয়াক পৰ্যাপ্ত পৰিমাণে নাপায়, তেতিয়া ইয়াৰ অভাৱ হয়। ইয়াৰ অভাৱৰ কাৰণ কি কি জানো আহক-
ভিটামিন ইৰ অভাৱত বহু কাৰণ থাকিব পাৰে। আটাইতকৈ সাধাৰণ কাৰণটো হ’ল অস্বাস্থ্যকৰ খাদ্যাভ্যাস, য’ত ভিটামিন ই সমৃদ্ধ খাদ্য অন্তৰ্ভুক্ত নহয়।ইয়াৰ বাহিৰেও ক্ৰনিক পেনক্ৰিয়াটাইটিছ, চিষ্টিক ফাইব্ৰ’ছিছ আৰু চিলিয়াক ডিজিজৰ দৰে কিছুমান ৰোগে শৰীৰৰ ভিটামিন ই শোষণ ক্ষমতাত প্ৰভাৱ পেলায়। শিশুৰ এই অভাৱ অকাল জন্মৰ বাবে হ’ব পাৰে। কিছুমান ক্ষেত্ৰত অতি কম চৰ্বিযুক্ত খাদ্য দীৰ্ঘদিন গ্ৰহণ কৰিলেও ইয়াৰ অভাৱ হয়, কাৰণ ভিটামিন ই চৰ্বিত দ্ৰৱীভূত হৈ শৰীৰত সঠিকভাৱে কাম কৰে, যেতিয়া পৰ্যাপ্ত পৰিমাণৰ চৰ্বি থাকে।
ভিটামিন ইৰ অভাৱৰ লক্ষণসমূহ-
দিল্লীৰ আৰ এম এল হাস্পতালৰ চিকিৎসা বিভাগৰ ডাঃ সুভাষ গিৰিয়ে ব্যাখ্যা কৰে যে, ভিটামিন ইৰ অভাৱৰ লক্ষণসমূহ ক্ৰমান্বয়ে দেখা দিয়ে আৰু ই শৰীৰৰ স্বাভাৱিক কাম-কাজত গুৰুতৰ প্ৰভাৱ পেলাব পাৰে। এই অভাৱে বিশেষকৈ পেশী আৰু স্নায়ুতন্ত্ৰত প্ৰভাৱ পেলায়। ইয়াৰ লক্ষণসমূহ হ’ল-
- পেশীৰ দুৰ্বলতাঃ শৰীৰৰ পেশীত শক্তিৰ অভাৱ হ’ব পাৰে।
- ক্লান্তি আৰু অলসতা: সকলো সময়তে ভাগৰুৱা অনুভৱ কৰা বা শক্তিৰ অভাৱ।
- ভাৰসাম্যৰ সমস্যা: খোজ কঢ়া বা থিয় হৈ থকাৰ সময়ত অস্থিৰ অনুভৱ কৰা।
- চকুৰ সমস্যাঃ দৃষ্টিশক্তি ম্লান হোৱা বা চকুৰ দৃষ্টিশক্তি দুৰ্বল হোৱা।
- ছালত প্ৰভাৱঃ ছালখন শুকান, নিৰ্জীৱ হৈ পৰে আৰু সোনকালে বুঢ়া যেন লাগে।
- ৰোগ প্ৰতিৰোধ ক্ষমতা হ্ৰাস: শৰীৰ সংক্ৰমণৰ প্ৰতি সোনকালে দুৰ্বল হ’ব পাৰে।
- শিশুৰ বৃদ্ধিৰ স্থবিৰতাঃ শাৰীৰিক আৰু মানসিক বিকাশত প্ৰভাৱ পৰিব পাৰে।
প্ৰতিৰোধ –
- স্বাস্থ্যসন্মত খাদ্য গ্ৰহণ কৰিব লাগে। য’ত সেউজীয়া পাতৰ শাক-পাচলি, শুকান ফল-মূল, গুটি আৰু উদ্ভিদ তেল থাকে।
- পাচনতন্ত্ৰৰ কোনো সমস্যা হ’লে নিয়মীয়াকৈ স্বাস্থ্য পৰীক্ষা কৰিব লাগে।
- চিকিৎসকৰ পৰামৰ্শ অনুসৰি পৰিপূৰক গ্ৰহণ কৰিব লাগে।
- শিশু আৰু বৃদ্ধসকলৰ বিশেষ যত্ন ল’ব লাগে, কিয়নো তেওঁলোকৰ অভাৱত ভুগিবলগীয়া হোৱাৰ সম্ভাৱনা বেছি।
