যদি আপোনাৰ সন্তানে দশম শ্ৰেণীৰ পৰীক্ষাৰ বাবে প্ৰস্তুতি চলাই আছে তেন্তে এই খবৰটো আপোনাৰ বাবে অতি গুৰুত্বপূৰ্ণ। কেন্দ্ৰীয় মাধ্যমিক শিক্ষা ব’ৰ্ড চমুকৈ চিবিএছইয়ে ২০২৬ চনৰ পৰা দশম শ্ৰেণীৰ ব’ৰ্ড পৰীক্ষাৰ পদ্ধতিত বৃহৎ পৰিৱৰ্তনৰ কথা ঘোষণা কৰিছে।
এতিয়া ছাত্ৰ-ছাত্ৰীয়ে বছৰত দুবাৰকৈ পৰীক্ষাত অৱতীৰ্ণ হোৱাৰ সুযোগ পাব। ইয়াৰ উদ্দেশ্য হৈছে ছাত্ৰ-ছাত্ৰীৰ ওপৰত অতিৰিক্ত হেঁচা বা চাপ কমোৱা আৰু তেওঁলোকক উন্নত প্ৰদৰ্শনৰ দ্বিতীয়টো সুযোগ দিয়া।
নতুন নিয়ম কি?
চিবিএছইৰ পৰীক্ষা নিয়ন্ত্ৰক সনয়ম ভৰদ্বাজে জনাইছে যে এতিয়াৰে পৰা দশম শ্ৰেণীৰ ব’ৰ্ড পৰীক্ষা দুটা পৰ্যায়ত অনুষ্ঠিত হ’ব। প্ৰথমটো পৰ্যায় ফেব্ৰুৱাৰী মাহত আৰু দ্বিতীয় পৰ্যায়ৰ পৰীক্ষা মে’ মাহত অনুষ্ঠিত হ’ব।
উল্লেখনীয় বিষয় এয়াই যে প্ৰতিগৰাকী ছাত্ৰ-ছাত্ৰীয়ে প্ৰথম পৰ্যায়ৰ পৰীক্ষাত অৱতীৰ্ণ হোৱাটো বাধ্যতামূলক হ’ব। আনহাতে দ্বিতীয়টো পৰ্যায়ৰ পৰীক্ষা সম্পূৰ্ণ বিকল্প হ’ব। অৰ্থাৎ যদি কোনো শিক্ষাৰ্থীয়ে তেওঁৰ প্ৰথম প্ৰচেষ্টাৰ নম্বৰত সন্তুষ্ট নহয়, তেন্তে তেওঁ দ্বিতীয়টো পৰ্যায়ৰ পৰীক্ষাত অৱতীৰ্ণ হ’ব পাৰিব।
কিয় লোৱা হ’ল এই সিদ্ধান্ত?
নতুন ৰাষ্ট্ৰীয় শিক্ষা নীতিৰ পৰামৰ্শ অনুযায়ী চিবিএছইয়ে এই ঐতিহাসিক সিদ্ধান্ত গ্ৰহণ কৰিছে। ইয়াৰ উদ্দেশ্য হৈছে ছাত্ৰ-ছাত্ৰীসকলক এক নমনীয় আৰু মানসিক চাপমুক্ত পৰিৱেশ প্ৰদান কৰা যাতে তেওঁলোকে নিজৰ ভুলৰ পৰা শিক্ষা ল’ব পাৰে আৰু উন্নত প্ৰদৰ্শন কৰিব পাৰে। ব’ৰ্ডৰ মতে এজন শিক্ষাৰ্থীৰ প্ৰতিভাৰ সম্পূৰ্ণ মূল্যায়ন এটা পৰীক্ষাৰ জৰিয়তে কৰিব নোৱাৰি।
