পশ্চিম বংগত সংঘটিত হৈছে এক শোকাৱহ ঘটনা। শুকুৰবাৰে পুৱা ৰাজ্যখনৰ ঝাৰগ্ৰামত এখন চলন্ত ৰে’লৰ খুন্দাত তিনিটাকৈ বনৰীয়া হাতীৰ মৃত্যু হৈছে। খৰগপুৰ-টাটানগৰ পথত চলি থকা এখন ৰে’লে সাতজনীয়া হাতীৰ এটা জাকে ৰে’ল পথ পাৰ হোৱাৰ সময়তে খুন্দা মাৰে।
এই দুৰ্ঘটনাত দুটা হাতী পোৱালী আৰু এটা প্ৰাপ্তবয়স্ক হাতীৰ থিতাতে মৃত্যু হয়।
এই দুৰ্ঘটনা সন্দৰ্ভত নিশান্ত কুমাৰ নামৰ এগৰাকী শীৰ্ষ বিষয়াই কয়, ‘12022 বৰবীল-হাওৰা অভিমুখী জনশতাব্দী এক্সপ্ৰেছৰ খুন্দাত তিনিটা হাতীৰ মৃত্যু হোৱা বুলি প্ৰাথমিক তথ্যত প্ৰকাশ পাইছে। ঘটনা সন্দৰ্ভত খৰগপুৰ ডিভিজনেল ৰে’লৱে মেনেজাৰে তদন্তৰ নিৰ্দেশ প্ৰদান কৰিছে। তদন্তৰ তথ্য প্ৰকাশ পোৱাৰ পিছতহে প্ৰকৃত কাৰণ জানিব পৰা যাব।’
উল্লেখ্য যে, অসমৰ লগতে পশ্চিম বংগ আৰু ওড়িশাত ক্ৰমাত বৃদ্ধি পাইছে হাতী-মানুহৰ সংঘাত। বনাঞ্চল সংকুচিত হৈ অহাৰ বাবে বনৰীয়া হাতীসমূহে লোকালয়লৈ প্ৰৱেশ কৰিবলৈ ধৰাৰ বাবেই এইধৰণৰ কৰুণ ঘটনা সংঘটিত হৈ অহা বুলিও ক্ষেদ প্ৰকাশ কৰে প্ৰকৃতিপ্ৰেমীসকলে।
অৱশ্যে হাতী-মানুহৰ সংঘাত ৰোধ কৰিবলৈ এইকেইখন ৰাজ্যৰ চৰকাৰে অহৰ্নিশে প্ৰচেষ্টা অব্যাহত ৰাখিছে যদিও ফলপ্ৰসু নোহোৱাত চিন্তিতও হৈ পৰিছে সচেতন মহল।
