আজি মুখ্যমন্ত্ৰী ড০ হিমন্ত বিশ্ব শৰ্মাৰ অধ্যক্ষতাত অনুষ্ঠিত হোৱা ৰাজ্য চৰকাৰৰ কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়। বৈঠকৰ অন্তত মুখ্যমন্ত্ৰী শৰ্মাই সংবাদমেল সম্বোধন কৰি সিদ্ধান্তসমূহ সদৰি কৰে।
আজিৰ কেবিনেটে ভূমি ক্ৰয়-বিক্ৰয়ক লৈ গ্ৰহণ কৰে এটা ডাঙৰ সিদ্ধান্ত। এতিয়াৰে পৰা যিকোনো ধৰ্মৰ লোকে আন ধৰ্মৰ লোকক সহজতে মাটি বিক্ৰী কৰিব নোৱাৰিব। অৰ্থাত বিভিন্ন প্ৰক্ৰিয়াৰ মাজেৰেহে ভূমি ক্ৰয় বা বিক্ৰয় কৰিব পাৰিব। অৱশ্যে এই সন্দৰ্ভত স্বধৰ্মৰ লোকৰ মাজত কোনো জটিলতা নাথাকিব।
মুখ্যমন্ত্ৰী হিমন্ত বিশ্ব শৰ্মা নেতৃত্বাধীন কেবিনেটে লোৱা সিদ্ধান্তটো হৈছে ইণ্টাৰ ৰিলিজিয়ন লেণ্ড ট্ৰান্সফাৰ। ইণ্টাৰ ৰিলিজিয়ন লেণ্ড ৰেগুলেট কৰাৰ বাবে আজি কেবিনেটে এখন এছঅ’পিত অনুমোদন জনায়।
এই এছঅ’পি অনুসৰি, ভূমি বিক্ৰীৰ বাবে প্ৰথম প্ৰস্তাৱ যাব এছডিচিলৈ। যদি স্বধৰ্মৰ লোকৰ মাজত ভূমি ক্ৰয় বা বিক্ৰী হয় তেন্তে ইয়াত কোনো জটিলতা নাই। যদি ধৰ্ম বেলেগ হয় তেন্তে সকলো পৰীক্ষা কৰাৰ পিছত প্ৰস্তাৱটো এছডিচিৰ পৰা উপায়ুক্ত কাৰ্যালয়লৈ প্ৰেৰণ কৰা হ’ব।
এই প্ৰস্তাৱটো উপায়ুক্তই ৰাজহ বিভাগলৈ প্ৰেৰণ কৰিব। পিছত ৰাজহ বিভাগে অসম আৰক্ষীৰ স্পেচিয়েল ব্ৰাঞ্চলৈ প্ৰস্তাৱটো প্ৰেৰণ কৰিব। স্পেচিয়েল ব্ৰাঞ্চে চাৰিটা দিশ পৰীক্ষা কৰি এছ বিয়ে পুনৰ চৰকাৰক জনাব, চৰকাৰে কথাখিনি উপায়ুক্তক জনাব আৰু উপায়ুক্তই মাটিখিনি সন্দৰ্ভত অন্তিম সিদ্ধান্ত গ্ৰহণ কৰিব।
সংবাদমেলত মুখ্যমন্ত্ৰীয়ে এই কথাখিনি জনোৱাৰ লগতে এই ব্যৱস্থাটো ৰাজ্যৰ বাহিৰৰ এনজিঅ’ৰ ক্ষেত্ৰটো প্ৰযোজ্য হ’ব বুলি উল্লেখ কৰে।
