বিহাৰত চলি থকা ভোটাৰ তালিকাৰ বিশেষ পুনৰীক্ষণ প্ৰক্ৰিয়াক লৈ সোমবাৰে দেশৰ সৰ্বোচ্চ ন্যায়ালয়ে কৰিছে ডাঙৰ মন্তব্য। ভোটাৰ তালিকাৰ বিশেষ পুনৰীক্ষণৰ কাম-কাজত যদি কোনো অনিয়ম দেখা যায়, তেন্তে সমগ্ৰ প্ৰক্ৰিয়াটোৱেই বাতিল কৰা হ’ব বুলি মন্তব্য কৰে সৰ্বোচ্চ ন্যায়ালয়ে।
এই বিষয়টো সন্দৰ্ভত এতিয়া অহা ৭ অক্টোবৰত চূড়ান্ত শুনানি অনুষ্ঠিত হ’ব।
ন্যায়াধীশ সূৰ্যকান্ত আৰু ন্যায়াধীশ জয়মাল্যা বাগচীৰ বিচাৰপীঠে বিষয়টোৰ শুনানি গ্ৰহণ কৰিছিল। বিচাৰপীঠে কয় যে যদি এছ আই আৰ প্ৰক্ৰিয়াত সাংবিধানিক সুৰক্ষা ব্যৱস্থাৰ লগত আপোচ কৰা হয়, তেন্তে সমগ্ৰ প্ৰক্ৰিয়াটো অবৈধ বুলি ঘোষণা কৰা হ’ব।
বিচাৰপীঠে স্পষ্ট কৰি দিয়ে যে আদালতে বিহাৰৰ এছ আই আৰ সন্দৰ্ভত যি সিদ্ধান্ত ল’ব, সেয়া সমগ্ৰ ভাৰততে প্ৰযোজ্য হ’ব।
আদালতে লগতে কয় যে আমি টুকুৰা টুকুৰকৈ আদেশ বা নিৰ্দেশ দিব নোৱাৰো। বিহাৰ SIR সন্দৰ্ভত দিয়া চূড়ান্ত সিদ্ধান্তটোৱে সমগ্ৰ দেশত প্ৰযোজ্য হ’ব।
ইফালে ৭ অক্টোবৰত হ’বলগীয়া চূড়ান্ত শুনানিৰ সময়ত বিহাৰৰ এছ আই আৰ আৰু দেশজুৰি এছ আই আৰৰ সৈতে জড়িত বিষয়সমূহৰ ওপৰত আবেদনকাৰীসকলে নিজৰ যুক্তি দাঙি ধৰিব পাৰিব বুলি উচ্চতম ন্যায়ালয়ে জনাইছে।
ইয়াৰ সমান্তৰালভাৱে ৮ ছেপ্টেম্বৰৰ নিৰ্দেশ প্ৰত্যাহাৰৰ বাবে আদালতে এখন জাননী জাৰি কৰিছে, য’ত নিৰ্বাচন আয়োগক বিহাৰ এছ আই আৰত আধাৰ কাৰ্ডক ১২ সংখ্যক প্ৰয়োজনীয় নথি হিচাপে অন্তৰ্ভুক্ত কৰিবলৈ নিৰ্দেশ দিয়া হৈছিল।
