নৱেম্বৰ মাহত অনুষ্ঠিত হ’বলগীয়া বিহাৰ বিধান সভা নিৰ্বাচনৰ বাবে মঙলবাৰে প্ৰথমখন প্ৰাৰ্থীৰ তালিকা প্ৰকাশ কৰিছে ভাৰতীয় জনতা পাৰ্টীয়ে। ১০১ খন আসনত প্ৰতিদ্বন্দ্বিতা কৰিবলগীয়া বিজেপিৰ প্ৰথমখন তালিকাত ৭১ গৰাকী প্ৰাৰ্থীৰ নাম প্ৰকাশ কৰা হৈছে।
তালিকাত প্ৰাক্তন বিধায়ক আৰু মন্ত্ৰীৰ নাম উল্লেখ আছে। প্ৰথমখন তালিকাত পিছপৰা অনুসূচীত জাতি, মহিলা, অনুসূচীত জনজাতিৰ ৫০তকৈ অধিক প্ৰাৰ্থীক প্ৰাধান্য দিয়া পৰিলক্ষিত হৈছে।
কুম্হৰাৰ পৰা অৰুণ সিংহা আৰু পাটনা চাহিবৰ পৰা নন্দ কিশোৰ যাদৱৰ টিকট কৰ্তন কৰি ৭০ৰ উৰ্ধ্বৰ প্ৰেম কুমাৰ গয়াক প্ৰাৰ্থিত্ব প্ৰদান কৰিছে।
ইফালে, ২০২৪ চনৰ লোকসভা নিৰ্বাচনত পৰাজিত হোৱা দুগৰাকী প্ৰাৰ্থীক এইবাৰৰ বিধানসভাৰ প্ৰাৰ্থিত্ব প্ৰদান কৰিছে বিজেপিয়ে। বক্সৰৰ লোকসভাৰ প্ৰাৰ্থী মিথিলেশ তিৱাৰীক বৈকুঠপুৰ আৰু পাটলিপুত্ৰৰ লোকসভাৰ প্ৰাৰ্থী ৰামকৃপাল যাদৱক দানাপুৰৰ পৰা টিকট প্ৰদান কৰিছে।
ইয়াৰ উপৰি বিজেপিৰ জ্যেষ্ঠ নেতা সম্ৰাট চৌধুৰীক তাৰাপুৰ, মংগল পাণ্ডেক ছিৱান, সঞ্জীৱ চৌৰসিয়াক দীঘা আৰু ৰজনীশ কুমাৰক তেঘড়াৰ পৰা প্ৰাৰ্থিত্ব প্ৰদান কৰা হৈছে।
বিজেপিৰ ৭১ জনীয়া প্ৰথমখন তালিকাত আছে ৯গৰাকী মহিলা, ৫গৰাকী অনুসূচিত জাতি আৰু এগৰাকী অনুসূচিত জনজাতি লোক।
বিজেপিয়ে তেওঁলোকৰ প্ৰাৰ্থিত্ব প্ৰদানৰ প্ৰথমখন তালিকাত সকলো শ্ৰেণীৰ লোককেই সামৰি লোৱা পৰিলক্ষিত হৈছে। বিধানসভা নিৰ্বাচনৰ প্ৰথম তালিকাত অবিচিৰ ১৭, অতি পিছপৰা শ্ৰেণীৰ ১১, মহিলা ৯ আৰু SC-ST শ্ৰেণীৰ ৬ গৰাকী প্ৰাৰ্থীক প্ৰাৰ্থিত্ব প্ৰদান কৰিছে।
উল্লেখ্য যে ২৪৩খন আসনযুক্ত বিহাৰ বিধানসভা নিৰ্বাচন দুটা পৰ্যায়ত ক্ৰমে ৬ নৱেম্বৰ আৰু ১১ নৱেম্বৰত অনুষ্ঠিত হ’ব। ১৪ নৱেম্বৰত কৰা হ’ব ভোটগণনা।
