ইৰাণৰ ওপৰত আমেৰিকা আৰু ইজৰাইলৰ আক্ৰমণৰ পিছত মধ্যপ্ৰাচ্যত চলি থকা উত্তেজনাই অধিক বিপজ্জনক ৰূপ লোৱা যেন লাগে। ইৰাণে উপসাগৰীয় দেশসমূহক লক্ষ্য কৰি থকাৰ সময়তে আমেৰিকাই ভাৰত মহাসাগৰত ইৰাণৰ এখন জাহাজ ডুবাই পেলাইছিল, য’ত ৮০ জনতকৈ অধিক লোকৰ মৃত্যু হোৱা বুলি জানিব পৰা গৈছে।
ইফালে ইৰাণৰ এই আক্ৰমণে কাটাৰত আমেৰিকাৰ এক গুৰুত্বপূৰ্ণ ক্ষেপণাস্ত্ৰ সতৰ্কবাণী ব্যৱস্থাৰ ক্ষতিসাধন কৰাৰ ইংগিত দিয়া উল্লেখযোগ্য তথ্য ওলাইছে। এই ৰাডাৰ ব্যৱস্থাটো অঞ্চলটোত আমেৰিকাৰ সামৰিক চোৱাচিতাৰ এক গুৰুত্বপূৰ্ণ উপাদান আছিল আৰু ইয়াক আমেৰিকাৰ প্ৰতিৰক্ষা ব্যৱস্থাৰ “চকু” বুলি গণ্য কৰা হৈছিল।
প্ৰায় ১১ বিলিয়ন ডলাৰ ব্যয়েৰে নিৰ্মিত এই ৰাডাৰটো আছিল আমেৰিকাৰ ক্ষেপণাস্ত্ৰ প্ৰতিৰক্ষা নেটৱৰ্কৰ এক গুৰুত্বপূৰ্ণ অংশ। এই আক্ৰমণে অঞ্চলটোত নিয়োজিত ক্ষেপণাস্ত্ৰ প্ৰতিৰক্ষা ব্যৱস্থাত যথেষ্ট আঘাত হানিছে আৰু সময়মতে সম্ভাৱ্য ক্ষেপণাস্ত্ৰ আক্ৰমণ ধৰা পেলোৱাৰ ক্ষমতাত প্ৰভাৱ পেলাব পাৰে। এই ঘটনাক আমেৰিকাৰ সামৰিক আন্তঃগাঁথনিৰ বাবে এক গুৰুতৰ কৌশলগত ক্ষতি হিচাপে গণ্য কৰা হৈছে।
উপগ্ৰহৰ চিত্ৰইও আমেৰিকাৰ সামৰিক ঘাটিটোৰ ক্ষতি হোৱাটো নিশ্চিত কৰিছে। প্লেনেট লেবে প্ৰকাশ কৰা ছবিত আমেৰিকাৰ মহাকাশ বাহিনীৰ এএন/এফপিএছ-১৩২ (ব্লক-৫) বেলিষ্টিক মিছাইল আগতীয়া সতৰ্কবাণী ৰাডাৰ ব্যৱস্থাৰ চাৰিওফালে ক্ষতি আৰু অগ্নিনিৰ্বাপক অভিযান দেখা গৈছে। এই ৰাডাৰটোৱেই হৈছে মধ্যপ্ৰাচ্যত আমেৰিকাৰ সেনাই পৰিচালনা কৰা আটাইতকৈ ডাঙৰ ক্ষেপণাস্ত্ৰ সতৰ্কবাণী ৰাডাৰ বুলি ধাৰণা কৰা হৈছে, যিয়ে সমগ্ৰ অঞ্চলটোত ক্ষেপণাস্ত্ৰৰ কাৰ্যকলাপ নিৰীক্ষণ কৰে।
ইৰাণৰ ইছলামিক ৰিভল্যুচনেৰী গাৰ্ড কৰ্পছে এই আক্ৰমণক নিখুঁত মিছাইল আক্ৰমণ বুলি অভিহিত কৰিছে। অৱশ্যে একাংশ সামৰিক বিশেষজ্ঞৰ মতে এই আক্ৰমণ কম খৰচী আক্ৰমণাত্মক ড্ৰ’নে সংঘটিত হ’ব পাৰে, সম্ভৱতঃ শ্বাহেদ ধৰণৰ ড্ৰ’নে। খবৰ অনুসৰি, ক্ষেপণাস্ত্ৰ আৰু ড্ৰ’নৰ সৈতে একেলগে হোৱা বৃহৎ আক্ৰমণৰ সময়ত ড্ৰ’নে আমেৰিকাৰ প্ৰতিৰক্ষা অঞ্চলত সফলতাৰে প্ৰৱেশ কৰে।
এই ৰাডাৰ ব্যৱস্থাটো আমেৰিকাৰ প্ৰতিৰক্ষা কোম্পানী ৰেথিয়নে উন্নীতকৃত আগতীয়া সতৰ্কবাণী ৰাডাৰ (UEWR) কাৰ্যসূচীৰ অধীনত প্ৰস্তুত কৰিছিল। ইয়াৰ অনন্য বৈশিষ্ট্য হ’ল ইয়াৰ বেলিষ্টিক মিছাইল আৰু অন্যান্য আকাশী ভাবুকি প্ৰায় ৫,০০০ কিলোমিটাৰ দূৰত্বলৈকে অনুসৰণ কৰাৰ ক্ষমতা। কাটাৰত ইয়াৰ অৱস্থানক অতি কৌশলগত বুলি গণ্য কৰা হয়, কিয়নো ইয়াৰ দ্বাৰা ইৰাণ, ইৰাক, ছিৰিয়া, তুৰস্ক, মধ্য এছিয়াৰ কিছু অংশ, আৰু ভাৰত মহাসাগৰৰ ওপৰত চোৰাংচোৱাগিৰি কৰিব পৰা যায়।
সামৰিক বিশ্লেষকৰ মতে, আমেৰিকাত উপগ্ৰহ আৰু অন্যান্য ৰাডাৰৰ সৈতে সংযুক্ত গ্ল’বেল চেন্সৰ নেটৱৰ্ক আছে যদিও এ এন/এফপিএছ-১৩২ৰ দৰে বৃহৎ, স্থায়ী ৰাডাৰ ব্যৱস্থাৰ ক্ষতিসাধন হ’লে আঞ্চলিক চোৰাংচোৱাগিৰি সাময়িকভাৱে হেৰুৱাবলগীয়া হ’ব পাৰে। ইমান ডাঙৰ ৰাডাৰ সলনি বা পুনৰ সংস্থাপন কৰাটো সহজ নহয় আৰু ইয়াৰ বাবে যথেষ্ট সময় লাগিব পাৰে। এই কাৰণেই এই অঞ্চলত ক্ষেপণাস্ত্ৰ অনুসৰণ আৰু চোৱাচিতাৰ ক্ষমতা কিছু সময়ৰ বাবে দুৰ্বল হৈ পৰিব পাৰে, যদিও এই অঞ্চলত আমেৰিকাৰ বহু গুৰুত্বপূৰ্ণ সামৰিক ঘাটি আৰু বিশ্বৰ শক্তি যোগানৰ সৈতে জড়িত গুৰুত্বপূৰ্ণ সাগৰীয় পথ আছে।
