নাৰী তুমি অনন্যা
নাৰী তুমি মহিয়সী
নাৰী ঈশ্বৰৰ এক সুন্দৰ সৃষ্টি
নাৰী মানেই প্ৰকৃতি আৰু প্ৰকৃতি মানেই পৃথিৱী। নাৰী হৈছে শক্তিৰ প্ৰতীক, সহনশীলতাৰ প্ৰতীক আৰু সৃষ্টিৰ মূল আধাৰ। নাৰীৰ সন্মান, সুৰক্ষা আৰু অধিকাৰ সুনিশ্চিত কৰাটো আমাৰ সকলোৰে দায়িত্ব। সাহস আৰু প্ৰেৰণাৰ এক মূৰ্তমান প্ৰতীক হৈছে নাৰী। নাৰী অবিহনে জীৱনৰ কল্পনা কৰাটো যথেষ্ট কঠিন। পৃথিৱীৰ সকলো মহান ব্যক্তিয়ে এগৰাকী নাৰীৰ গৰ্ভৰ পৰাই জন্ম লাভ কৰে আৰু সেইসকল মহান লোকে এগৰাকী নাৰীৰ পৰাই গ্ৰহণ কৰে তেওঁলোকৰ জীৱনৰ প্ৰাৰম্ভিক শিক্ষা।
ন মাহ ১০ দিন ধৰি অশেষ কষ্ট আৰু যন্ত্ৰণাৰ জৰিয়তে পৃথিৱী দিপ্তীময় কৰা প্ৰতিগৰাকী নাৰীৰ সমান অধিকাৰ আৰু সবলীকৰণৰ জৰিয়তে নাৰীৰ প্ৰতি অগাধ সন্মান আৰু শ্ৰদ্ধা জনোৱাৰ উদ্দেশ্য সমগ্ৰ বিশ্বতে নাৰী দিৱস পালন কৰা হয়। গতিকে নাৰী দিৱস উদযাপন কৰাটো হৈছে নিজৰ জীৱনৰ প্ৰতিগৰাকী মহিলাৰ প্ৰতি কৃতজ্ঞতা অনুভৱ কৰাৰ এক উপায়।
বিশ্বায়নৰ যুগত নাৰীয়ে বৰ্তমান লিংগ বৈষম্যতাৰ তথাকথিত বেহু ফালি সমাজত নিজকে সগৌৰৱে প্ৰতিষ্ঠা কৰিবলৈ সক্ষম হৈছে। নাৰীক কেতিয়াও দুৰ্বল বুলি ভাৱিব নালাগে। নাৰী যেতিয়া জাগি উঠে , তেতিয়া কিছুমান মুখাপিন্ধা ভদ্ৰলোকৰ প্ৰকৃত স্বৰূপ ওলাই পৰে। নাৰী হৈছে শক্তিৰ প্ৰতীক, সহনশীলতাৰ প্ৰতীক আৰু সৃষ্টিৰ মূল আধাৰ। নাৰীয়ে মানৱ সভ্যতা-সংস্কৃতি, সমাজ জীৱন তথা ৰাষ্ট্ৰ নিৰ্মাণৰ যাত্ৰাৰ অগ্ৰণী চালিকাশক্তি। নাৰীশক্তিৰ অপৰিসীম অৱদানে আমাৰ সমাজক, আমাৰ দেশক যুগে যুগে মহিমামণ্ডিত কৰি আহিছে। নাৰী হৈছে মৰম, সাহস, ধৈৰ্য আৰু ত্যাগৰ প্ৰতীক। এগৰাকী নাৰীয়ে মাতৃ, ভগ্নী, কন্যা বা পত্নী হিচাপে নিজৰ মৰম আৰু যত্নেৰে পৰিয়াল আৰু সমাজক আগবঢ়াই লৈ যায়।
আন্তঃৰাষ্ট্ৰীয় নাৰী দিৱস (IWD) হৈছে প্ৰতি বছৰে ৮ মাৰ্চত মহিলা অধিকাৰ আন্দোলনৰ কেন্দ্ৰবিন্দু হিচাপে পালন কৰা এক বিশ্বব্যাপী বন্ধৰ দিন, য’ত লিংগ সমতা, প্ৰজনন অধিকাৰ, আৰু নাৰীৰ ওপৰত হোৱা হিংসা আৰু নিৰ্যাতনৰ দৰে বিষয়সমূহৰ প্ৰতি দৃষ্টি আকৰ্ষণ কৰা হয়। ১৯১০ চনৰ আগষ্ট মাহত কোপেনহেগেনত অনুষ্ঠিত হোৱা আন্তৰ্জাতিক মহিলা সন্মিলনত জাৰ্মানীৰ আগশাৰীৰ সমাজবাদী লুইজ জিট্জ আৰু ক্লাৰা জেটকিনে সম অধিকাৰৰ প্ৰসাৰৰ কৌশল হিচাপে বাৰ্ষিক আন্তঃৰাষ্ট্ৰীয় নাৰী দিৱস স্থাপনৰ প্ৰস্তাৱ আগবঢ়ায়। ১৯১৪ চনত ইউৰোপত ৮ মার্চ দিনটোত যুদ্ধৰ বিৰুদ্ধে আৰু সমগ্ৰ বিশ্বৰ নাৰী সমাজৰ প্ৰতি সহমর্মিতাৰে নাৰী দিৱস পালন কৰা হৈছিল বুলি তথ্য পোৱা যায়।
২০২৬ চনৰ নাৰী দিৱসৰ বিষয়বস্তু হৈছে- Rights, Justice and Action For All Man. আজিৰ দিনটোতে বিশ্বই একত্ৰিত হৈ নাৰী সকলক বাধা অতিক্ৰম কৰি জীৱনৰ সকলো ক্ষেত্ৰতে ইমান প্ৰচণ্ড উন্নতি সাধন কৰাৰ সাহসৰ শলাগ লয়।
