বিহাৰৰ লগতে সমগ্ৰ দেশতে আৰম্ভ হৈছে কানৱাৰ যাত্ৰা। এই কানৱাৰ যাত্ৰাৰ সময়তে বিহাৰত সংঘটিত হৈছে এক অঘটন। বিদ্যুৎস্পৃষ্ট হৈ ৯ জন ভক্তৰ মৃত্যু হোৱাৰ ঘটনাই সমগ্ৰ ৰাজ্যখনতে শোকৰ ছাঁ পেলাইছে।
বিহাৰৰ বৈশালী জিলাৰ হাজিপুৰ অঞ্চলত সংঘটিত হয় এই ঘটনা। এই কৰুণ ঘটনাটোত আন ৬ জন ভক্ত গুৰুতৰভাৱে আঘাতপ্ৰাপ্ত হয়। বৰ্তমান তেওঁলোক হাজিপুৰ সদৰ হাস্পতালত চিকিৎসাধীন হৈ আছে।
জেঠুই নিজামত গাঁৱৰ পৰা যোৱা ভক্তৰ দলটোৱে সোণপুৰ পাহলেজা ঘাটৰ পৰা উভতি আহি থকা সময়তে তেওঁলোকৰ বাহনখন উচ্চ ক্ষমতাসম্পন্ন বিদ্যুতৰ খুঁটাত খুন্দা মৰাৰ ফলতেই এই কৰুণ ঘটনাটো সংঘটিত হয়।
ঘটনা সন্দৰ্ভত হাজিপুৰ মহকুমা আৰক্ষী বিষয়া ওম প্ৰকাশে কয়, ‘শিৱ ভক্তৰ দলটোৱে এখন ডিজে বাহনত আহি আছিল। বাহনখনৰ উচ্চতা যথেষ্ট হোৱাৰ বাবে পথৰ ওপৰত থকা উচ্চ ক্ষমতা সম্পন্ন বৈদ্যুতিক তাঁৰৰ সংস্পৰ্শত আহে। অধিক তথ্য সংগ্ৰহৰ বাবে তদন্ত অব্যাহত ৰখা হৈছে’।
জানিব পৰা অনুসৰি, হৰিহৰ মন্দিৰত জলাভিষেক কৰিবলৈ গৃহ চহৰৰ পৰা গংগা জল লৈ আহি থকা অৱস্থাতেই এই ঘটনা সংঘটিত হয়।
